رواية غوثهم يا صبر أيوب ج1 للكاتبة شمس محمد الفصل السابع والستون

هو مين دا اللي ابن أخو نَعيم؟ وأنتَ مين أصلًا.؟

هتفها يوسف بنبرةٍ جامدة أوقفت الأخر محلهِ وجمدته في مكانه وكأنه وضع في خانة اليْك حقًا والآن قد دنى من الهلاك أو فضح أمره، لقد أصبح قاب قوسين أو أدنى من الموت، والموت في حالته عن طريق فضح أمره وكشف هويته قبل أن يصل لما يريد، والآن فقط يبدو أن هويته ضاعت في سرابٍ، لذا تحرك له يوسف يقابله وهو يأسره بنظراته الحادة ليقول الأخر بنبرةٍ هادئة حاول صبغ حديثه بها:.

أنا أكيد مش هقدر أقولك حاجة دلوقتي، أنا لسه بدور على مكان اترزع فيه وحياتي كلها واقفة على كلمة بطلقة من مسدس، بس بما إنك سمعتني مش عاوز حد يعرف حاجة.
بدا يوسف أمامه مدهوشًا وقبل أن يتحدث وجد مُنذر يحذره بنظراته من اقتراب أحدهم نحوهما وقد كان مُحي هو الذي أقترب منهما وهتف بنبرةٍ منهكة:
أنا عندي امتحان بكرة هروح أنام وأصحى بليل أذاكر شوية، خدني معاك يا يوسف.

راقبه مُنذر بعينيهِ يحاول قراءة شخصيته فيما تغاضى يوسف عما وصل لسمعه ثم قال بنبرةٍ هادئة:
أحسن برضه وأرتاح شوية في البيت علشان سمارة لوحدها هناك و عمهم مش هيعرف يسيب سراج دلوقتي، يلا أركب العربية.
ركب مُحي السيارة دون أن يوجه أي حديثٍ أخر فيما فتح يوسف هاتفه ومد يده به ل مُنذر وهو يقول بنبرةٍ هادئة لكنها كانت صارمة وقوية:.

اكتبلي رقمك علشان أكيد مش هسكت على الهبل دا وإذا كنت فعلًا مش وراك مصيبة سودا فأنا هستنى إنك تعرفني كل حاجة، أما المكان دا فسيبها عليا ومتشغيلش بالك.

سجل مُنذر الرقم على هاتفه بصمتٍ تامٍ وتابع رحيل يوسف بعينيه الثاقبتين ليتحرك بعدها نحو الداخل يقف بجوار الشباب بقصدٍ ظاهري لكن في الحقيقة كان يحتمي بعمهِ وبوقوفهِ معه بنفس المكان وما إن تلاقت نظراتهما معًا ابتسم له نَعيم بطيبةٍ جعلته يطالعه بعينين ترقرق بهما الدمع وقد أخرج هاتفه يتصنع به الانشغال وهو يراقب وقوف إيهاب و إسماعيل بجوار الطبيب.

قاد يوسف سيارته وبعد فترة من القيادة الصامتة حيث أن مُحي غفى مكانه وأرجع رأسه للخلف فيما قاد يوسف بتركيزٍ في حديث مُنذر الذي أثار حفيظته، فكيف يكون ابن أخو نَعيم إذا كان أخوه لم يتزوج؟ مرت أسئلة كثيرة في عقله أصابته بضجيجٍ جعله يفكر بها، لازالت بدون هاتف وكلما هاتف والدتها تطمئنه ببعض الكلمات وتغلق معه، أخرج هاتفه وقرر أن يقوم بمهاتفة حماته لكنه وجد ضُحى سبقت بما يريد هو.

لقد أرسلت له صورتها برفقتها ورفقة شقيقته ثم صورة لها بمفردها وهي تضحك بسعادةٍ وكأنها تعيش أسعد لحظاتها، وجد نفسه يضحك بعينيه وهو يقوم بتكبير صورتها ليرى الضحكة في عينيها، منذ حدوث الواقعة وقد اختفت هذه الضحكة وانطفأت اللمعة في عينيها لذا شعر بقلبه يتحرك من الداخل بسعادةٍ لأجلها على عكس سكونه وركوزه وقد أغلق الهاتف من جديد وركز بصره على الطريق بحالٍ أفضل بعدما رد على ضُحى وكتب لها بمزاحٍ:.

عيني ليكِ، شوفي عاوزة إيه وأنا سداد.
كتبها من باب الجدِ وكأنه أمتن لها بحركتها هذه، لقد أتت في وقتها الصحيح بفعلها الأصح وبعد مرور دقائق أخرى من القيادة الطويلة وصل إلى بيت نَعيم وقد التفتت يوقظ ذلك النائم وهو ينادي عليه بنبرةٍ قوية:
مُحي، اصحى يالا وصلنا.
لم يأتيه الرد منه فقام بهزه بقوةٍ ونفاذ صبرٍ جعل الأخر ينتفض من محلهِ وهو يقول بخوفٍ كان يراوده بنومهِ:
الورقة! ورقة الامتحان فين؟

رفع يوسف أحد حاجبيه وهتف بسخريةٍ وكأنه لم يصدق رد فعل الأخر:
ورقة امتحان؟ قصدك ورقة أرقام النسوان، ورقة البفرة، قال ورقة امتحان قال، على مين يا موهي؟
مسح الأخر وجهه بكفيهِ معًا ثم قال بضجرٍ وهو يحاول التقاط أنفاسه المسلوبة منه بسبب ذعرهِ:.

أنتَ مش فاهم، إيهاب حلف لو مخلصتش صافي السنة دي من غير ما أشيل مادة حتى، هيشغلني صبي عنده، . وحلف كمان هيخلي أبويا يجوزني علشان أحترم نفسي، وخدت منه وعد قصاد كل دا لو اتخرجت وخلصت هفتح المكان بتاعي لوحدي.
فهم يوسف سبب ذعره واستذكار دروسه لذا هز رأسه مومئًا بحركةٍ خافتة وابتسم بسخريةٍ وهو يقول:.

بالظبط كدا، أنتَ مكانش ينفعك غيره، ولسه دا يدوبك بس بيمسي عليك شوية، يلا علشان تدخل تكمل نوم وتصحى تذاكر، دا طلع عمهم بصحيح.
نزلا من السيارة ودلفا البيت معًا وقد توجه مُحي إلى غرفته مباشرةً فيما خرجت سمارة له وما إن رأت يوسف أمامها قالت بحيرةٍ وكأنها تلقي العتاب عليهم:
كدا برضه؟ عيلة زي دي تروح فين؟ طب هو مجنون ودماغه مهوية وكلنا عارفينه أنتَ بقى بتهاوده ليه؟
هتف بنبرةٍ هادئة ردًا عليها بتوضيحٍ:.

في وضعه دا مش هيقدر يقعد من غيرها، بعدين دا مجنون زي ما قولتي ممكن يسيب المستشفى كلها علشان خاطرها، هي فين بس علشان ألحق أوديها وأرجع تاني الحارة.
ثواني قليلة مرت تبعها خروج جودي التي ركضت نحو يوسف وقد حملها بين ذراعيه ثم لثم وجنتها وهو يقول بمزاحٍ:
وحشتيني، بس دلوقتي هاخدك ونروح عند سراج بس عاوزك تكوني زي ما أنتِ شاطرة كدا ومتعمليش أي شقاوة ولا تزعليه علشان هو تعبان شوية.

حركت عينيها في ملامحه تتجول بها وسألته بنبرةٍ منكسرة:
هو سراج حصله حاجة؟
حرك رأسه نفيًا ثم هتف بثباتٍ حتى لا يظهر تأثره بنبرتها:
خالك زي الفل الحمد لله، وهتيجي تشوفي بنفسك.

صدقته وهي توميء له موافقةً فيما تحرك هو من البيت بعدما ودع سمارة التي وقفت تطمئن على زوجته وتخبره أنها تحاول التواصل معها لكن هاتفها دومًا يشير إلى الإغلاق حتى أخبرها أن الهاتف تدمر كُليًا ويمكن لها أن تتواصل معه حينما يعود لها، وقد رحل بالصغيرة التي سكتت عن الحديث بخوفٍ على أمانها الوحيد وخاصةً أن رجال البيت بأكمله رحلوا منه فمن المؤكد أن الخطر كان كبيرًا.

وصل يوسف بالصغيرة التي التزمت الصمت خوفًا من القادم، لا تعلم ما يمكن أن تراه هُنا لكنها خشيت أن تفقده أو تراه مُصابًا بأي شيءٍ، لطالما اختصرت الحياة به هو وكان هو كل الأمكنة في حين فرغت عليها الدنيا من بعد موت والديها وهي صغيرة العمر، شعر يوسف بها وبخوفها وقد حاول كثيرًا أن يُمازحها لكنها لم تتقبل كل ذلك وفقط كل ما أرادته هي رؤية خالها.

وصل بها لغرفة المشفى التي جلس فيها سراج برفقة الشباب و نَعيم فيما كان يطعمه إسماعيل في فمه حتى لا يتحرك هو وقد شدد الطبيب على خطورة الحركة مُعللًا أن العظام المُصاب يتوجب الحرس الشديد حتى تخرج الأشعة الطبية التي قام بعملها، رأته هي يتوسط الفراش الطبي فركضت نحوه ركضًا وما إن ضمها بذراعه السليم ودفن رأسه في عنقها استمع لصوت بكائها وشعر برجفة جسدها حتى ابتعد عنها يسألها بلهفةٍ:.

بتعيطي ليه؟ أنا كويس أهو قدامك.
جاوبته بنبرةٍ باكية وهي تتطلع إلى وجهه بعينيها الزرقاوتين:
خوفت، خوفت تمشي زي بابا وماما، مين عمل فيك كدا؟
ابتسم لها بحزنٍ ومسح وجهها وهو يقول بنبرةٍ حاول صبغها بالمرح لكي يعاون في إخراجها من حالتها:
مش عارف والله، بس دي ناس وحشة، المهم أنتِ أخبارك إيه؟ مش مهم أنا، أنتِ وحشتيني أوي بقالي 3 أيام مشوفتكيش فيهم، كل حاجة مش حلوة وأنتِ مش معايا.

ضمته من جديد وظل هو يمسح على ظهرها بخصلاتها وما إن تلاقت عينيه بعيني يوسف أمتن بنظراته مشكورًا له على إحضار الصغيرة إليه فيما ابتسم له يوسف ثم ودع البقية وتجهز للرحيل من جديد لكنه قبل أن يخطو تمام خطواته حذر مُنذر بنظراته حتى أومأ الأخر بأهدابه إليه كأنه يوافقه فكره دون أن ينطق به.

مر بعض الوقت الذي شارف على ساعتين تقريبًا وقد ترك يوسف مكانه وتوجه إلى الحارة مباشرةً خاصةً حينما حل الليل الجديد، تعجب من قدرته على الثبات بكل هذه القوة دون أن يطلب النوم أو الراحة، ثم ذكر نفسه أنه نام بالسيارة ويمكن أن يكون هذا هو السبب الوحيد الذي جعله بنفس الثبات، لذا حدث نفسه بصوتٍ مسموعٍ يثني على نفسهِ وهو يصف سيارته أمام البناية:
شكرًا يا يوسف والله إنك لسه حي.

كان محقًا بكل آسفٍ، فالأيام المنصرمة في حياتهِ خلال آخر هذا الأسبوع لاقى عذابًا مريرًا سواء بدنيًا أو نفسيًا، كان يشعر بالامتنانِ لنفسه حقًا بعد كل هذا الثبات أنه لم يهرب ولم ينهار ولم يُنهي حياته، وقد توجه أولًا إلى شقة حبيبته، فمنذ الأمس لم يراها ولم يتحدث معها وفقط يطمئن عن طريق شقيقته.

جلست عهد بحالة نفسية أخرى غير التي كانت عليها، كانت ممتنة لزيادة الفتيات لها فقد أجدن وبكل براعةٍ خروجها من خوفها وإضطراب ثباتها المهتز من الأساس وجلست على المقعد أمام المرآة ولاحظت وقوف كتفها الأيمن تمامًا وكلما حاولت رفع ذراعها شعرت بالألم يزداد أكثر، لذا استعانت بذراعها الأيسر ثم قامت بتحرير خصلاتها من المشبك البلاستيكي وأمسكت فرشاة الشعر تحاول تمشيط خصلاتها ولوهلةٍ كادت أن تستعين بأمها وتُنادي عليها، لكنها تفاجئت بطرقاتٍ فوق باب الغرفة جعلتها تأذن للطارق بالدخول وقد ظنته قمر أو ربما والدتها.

لم تضع في الحُسبان أن يطل هو بكل ثباتٍ من خلف الباب وقد ملأت رائحته الغُرفة بمروره أعتابها وقد تجمدت هي مكانها من حضوره صاحب الطلة الآسرة، حتى الآن تقع أسيرة في هيئته الأولى أما فأغلق الباب ثم أقترب منها يقف خلفها وهو يسألها باهتمامٍ:
عاملة إيه دلوقتي يا عسولة؟
شعرت بارتفاع ضربات قلبها إثر اقترابه منها وخاصةً وهو يحدثها بتلك النبرة الهادئة مما جعلها تحاول التحكم في نفسها وهي تقول بنبرةٍ هادئة:.

كويسة الحمد لله، أنتَ إيه أخبارك؟
حرك رأسه موافقًا وهتف موجزًا بعدما اعتدل في وقفته يطالع انعاكسها بالمرآة:
أهو شغال، قولت أجي أتطمن عليكِ قبل ما أنام.

هزت رأسها مومئةً له فلاحظ هو تحرير خصلاتها لذا قام بسحب الفرشاة من كفها بهدوء ثم بادر هو بتمشيط هذه الخصلات وهي تطالعه بدهشةٍ، لوهلةٍ تاهت فيه وهي تفكر بنفس السؤال المصاحب لها في حضرته وهي تسأل عن هويته، كل مرة تجمع بينهما الطرقات تقابله بهوية جديدة وكأنه يُجيد التحلي بكل الشخصيات، أما هو فأمسك خصلاتها يمشطها برفقٍ وبدلًا من جمعهما قام بتحريرها أكثر عند وجهها ثم أنزل غُرتها إلى جبينها وحرك رأسه نحوها يطالع وجهها ثم أشار لها نحو المرآة حتى تطالع نفسها.

حركت رأسها بكل خجلٍ وكأن الكهرباء مست جسدها تمامًا وخاصةً كتفها المتألم لتجد نفسها في هيئة رقيقة تُشبه هيئة فتيات جيل التسعينات، حيث غُرتها الساقطة على جبينها وخصلاتها السوداء المفرودة على طرفي وجهها المنحوت بنفس الملامح الرقيقة وقد أكملها حينما سحب الطوق البلاستيكي الأسود يضعه خلف الغُرة.

ابتسمت بفرحةٍ نطقتها عينيها من خلال العبرات اللامعة لتجده يقف من جديد بعيدًا عن مقعدها وهو يسألها من الخلف باهتمامٍ:
إيه رأيك يا عهد؟
هتفت بلهفةٍ حماسية تخبره بكل صدقٍ:
حلوة أوي، عاملة زي التسعينات.
سكتت بعدما أخفضت عينيها للأسفل ثم عاودت النظر إليه تسأله بلهفةٍ ذلك السؤال الذي لم ينفك عن عقلها:
أنتَ مين؟

عقد مابين حاجبيه بحيرةٍ فوجدها تلتفت له بكامل جسدها على المقعد تسأله بتعجبٍ وهي تطالع ملامحه وقد بدا حديثها تفسيرًا لمقصد سؤالها:.

أنا ساعات بتوه فيك، علطول بحس إنك 100 يوسف في بعض وكلهم غُرب عن بعض، بس مش غُرب عني، فيك كل الناس بكل الصفات اللي تخليني اسألك أنتَ مين، وليه أنتَ بس اللي علطول بحس إنه معاه حق في كل حاجة حتى أنا، وإزاي أنتَ الوحيد اللي ينفع آمن له حتى أكتر من نفسي؟ أنتَ كام يوسف في بعض؟

لقد داعبت حصون ثباته بحديثها وسؤالها الذي يخشاه هو، يخشى أن تتعجب منه وتخشى دخول عالمه الغامض الذي لم تعرف عنه سوى الاسم فقط، لقد سبق وأخبره طبيبه النفسي أنه يعاني من آخرين بداخله، وكلٌ منهم يرفض الإتفاق مع الآخر وتلك هي مشكلته تحديدًا، لذا حرر ذراعيه وأقترب منها يجلس على عاقبيه أمامها وهي تطالعه بفضولٍ جعله يرفع كفه ثم حرك غُرتها قليلًا حتى يتسنى له رؤية عينيها وهتف بكل صدقٍ يخبرها بمشاعره:.

حتى لو كنت مليون يوسف في بعض، وحتى لو كلهم مختلفين ومش فاهمين بعض، وحتى لو كلهم عمرهم ما اتفقوا مع بعض، هتفضلي أنتِ الحاجة الوحيدة اللي كل يوسف فيهم أتفق عليها مع التاني وهي حُبك أنتِ يا عهد، يمكن أنا وهما مكركبين ومش مفهومين بس الأكيد إننا يوم حسينا بحد، حسينا بيكِ أنتِ.

بدأت تبتسم رويدًا رويدًا بعينيها قبل شفتيها حتى وجدته يرفع وجهه ثم لثم وجنتها اليُسرى، لكن الغريب إنها لم تتراجع مثل السابق أو حتى تخشى قربه بل ابتسمت له بخجلٍ مما جعله يسألها بخبثٍ:
أنتِ شكلك خلاص اتعودتي.
طالعته بتعجبٍ من خلال عينيها باستفسارٍ هتفته بقولها:
اتعودت على إيه؟

ابتسم لها حينما أدرك أنها لم تفهمه وهتف في أذنها بنبرةٍ هامسة وهو يقول بما جمعهما أول مرة سويًا في هذه الغُرفة لتكون معه من بعدها:
علي حُضني.
شهقت تلقائيًا حينما تذكرت كيف كان اللقاء الأول الذي رافقته هذه الكلمة ليتورد وجهها فورًا وقبل أن تدفعه بعيدًا عنها وجدته يبتسم لها ثم هتف بقلة حيلة بعدما سحب كفها السليم يوقفها أمامه:.

أنا بهزر والله مش جاي أرخم، بس فعلًا أنا تعبان أوي ومحتاج أنام من هنا ليومين قدام، عاوزة حاجة دلوقتي؟
حركت رأسها نفيًا وهي تبتسم له ثم هتفت بثباتٍ:
عاوزاك دايمًا كويس وبخير.

أومأ هو موافقًا ثم لثم جبينها والتفت يتركها بمفردها في الغرفة بعدما أطمئن عليها، أو حقيقةً طمئن نفسه عليها بحقيقة تواجدها، لقد عادت من جديد له من بعد ليلةٍ كان سيخرج فيها أنفاسه الأخيرة، منذ أن خطى إلى هنا غريبًا أضحى مثل ملوك الأرض، لم ينكر بغضه للمكانِ عند أول قدومه لكن الآن ستبقى حارة العطار بكل الأماكن التي حتى وإن تغرب عنها ستبقى هي التي تسكنه، يبدو وكأن المكان هو الذي وجده وليس العكس.

دلف شقته على الفور بجسدٍ مُرتخي تمامًا ليجدها كعادتها منذ أن عاد إليها لم تغفل عينيها إلا في وجودهِ معها، أغلق الباب ثم أقترب منها يتوسد برأسه موضع قلبها وهو يقول بنبرةٍ هادئة تمامًا:
نيميني يا غالية.
ضحكت رغمًا عنها وبدأت تداعب خصلاته بيدها وهي تقول بنبرةٍ هادئة مثل نبرته:
حبيب عيون غَالية أنا أصلًا مستنياك علشان حضنك وحشني، قولي صاحبك عامل إيه دلوقتي، كويس صح؟

هز رأسه مومئًا لها ثم أغمض جفونه وسحب نفسًا عميقًا يملأ رئتيه برائحتها ثم سأل بنبرةٍ هادئة ولازال مُغمض العينين:
لسه نفس ريحة الورد متغيرتش، فاكرها من صغري وشبابي وكل أيامي لما كانت بتيجي في أحلامي تحاوطني، تصدقي أنا دلوقتي مش زعلان؟ على الأقل بقيتي موجودة علطول بعدما كان حلم في خيالي وبس يا ماما.

لثمت جبينه ومسحت على خصلاته بكفٍ وبالكف الأخر على ظهرهِ حتى تأكدت من انتظام أنفاسه التي تضرب في عنقها، لقد كبر واشتد عود جسده مثل الوتد الثابت بالأرض لكنه لم يزل في عينيها ذلك الصغير صاحب العشرة أعوام، لازال كما هو ذاك الشقي الذي يملأ البيت طوال اليوم بمرحه وضحكاته حتى غدا اليوم صامتًا لا يتكلم إلا في أقل الحالات، لكن مهما تغير وتبدل لن يتبدل قلبه النقي الذي تعرفه هي من بين كل القلوب، من الأساس هو قطعة أخرى منها، فحتى وإن تغربا القلوب لازالت تعرف بعضها.

كانت قمر تجلس في شقة خالها برفقة عُدي و ضُحى يقضون ليلهم سويًا وقد بدأ الفضول يتأكل الاثنتين بخصوص العمل بشركة الراوي وكيف تعامل مع الناس هناك، أما هو فلم يتخلص من فضولهما بل سرد عليهما تفاصيل اليوم حتى هتف بنبرةٍ منزعجة حينما تذكر هيئة عاصم ومروره من أمامه:.

راجل تشوفيه يبان عليه الهيبة وتحسيه خارج من التلفزيون كدا، بس أنا مقدرتش أكون هادي قصاده، حسيت نفسي عاوز أمسك في رقبته أخنقه على اللي عمله، مرة واحدة كدا افتكرت قهرة عمتي وحزنها ووجعها على اللي فات، مقدرتش أسكت بس رهف قالتلي لو في أيدي حاجة أعملها أني أفضل مكاني علشان أساعد يوسف ياخد حقه، ولا سامي دا أعوذ بالله، خلقته واخدة إنصراف، تحسي إن مفيش قبول أصلًا رغم إن شكله حلو أوي وللأسف يبان أنه ابن ناس.

هتفت ضُحى تحثه بقولها وتشجعه حتى لا يتراجع:
سيبك منهم كلهم، أهم حاجة حق أخوك، خلي بالك من فلوسه ومن سُمعة الشغل وخليك واخد حذرك هناك، يعني برضه مش أي حد ييجي يتصاحب عليك ولا أي حد يتكلم معاك تحكي أنتَ كمان، وزي ما يوسف قالك عُدي عبدالفضيل تمام؟
هز رأسه مومئًا فوجد قمر تسأله بنبرةٍ حزينة وكأنها تخشى الحصول على الجواب:
هو عم.
بترت عبارتها لتبدلها من جديد بأسى:
عاصم دا شبه بابا!

هتف عُدي بلهفةٍ ينفي هذا الشيء بقوله:
مستحيل، عمو مُصطفى مفيش زيه، وحتى لو شبهه فعلًا فهو أكيد مش زي عمو مصطفى ولا ييجي فيه أي حاجة، دول ناس كلاب مفيش في قلوبهم رحمة أصلًا، متزعليش نفسك أنتِ، أنا عارف إنك لسه مش قادرة تنسي اللي حصل بس كل دا هيتصلح وحقكم هيرجع زي ما يوسف رجع كدا من تاني.

حركت رأسها موافقةً وقد بدا الدمع يغزو مُقلتيها وتلك القبضة تضغط على قلبها، لم تنس حياتها بدون أخيها وكيف عانت مع أمها، لقد كانت الحياة قاسية عليهما حتى لدرجة الفقر أو ما أشد منه، عاشت حياة زهيدة تنازلت فيها عن كافة حقوقها حتى أنها كانت تخشى أن تطلب أي شيءٍ من خالها وذلك لأنها تشعر بعبء وجودها عليه.

أخرجها صوت الهاتف من دوامة أفكارها برقم زوجها الذي أتى كالغوثِ لها، اسمه زين الشاشة الخاصة بالهاتف وقد فتحت هي باب الشُرفة ودلفتها بعدما أحكمت غطاء رأسها وهي تقول بنبرةٍ هادئة:
السلام عليكم ورحمة الله وبركاته.
لاحظ هو من جوابها أن نبرتها خالية من أي مرحٍ كعادتها أو حتى سعادةٍ كما تفرح دومًا بمكالمته لها لتبدأ في سرد تفاصيل يومها، لذا سألها بنبرةٍ هادئة:
وعليكم السلام ورحمة الله وبركاته،.

مالك يا قمر فيه حاجة مزعلاكي ولا إيه؟
فهمت أنه استشعر ذلك من طريقتها لذا قالت بكل صراحةٍ يعهدها هو منها بدون أي تزييفٍ:
بصراحة، افتكرت حاجة كانت مزعلاني أوي، ولسه لحد النهاردة مزعلاني يا أيوب بصراحة بابا وحشني أوي، بقالي كام يوم نفسي أشوفه، أنا حتى معرفش المكان اللي مدفون فيه، أنا حاسة إني محتاجاه أوي، حتى الذكريات مسابهاش ليا قبل ما يمشي، أنا من غيره تعبت أوي أنا وماما.

بكت وهي تحدثه وقد زادت بالألم حقًا، أما فكان يسير في الشارع قرب بيتهِ لكنه بدل طريقه وعاد للزقاق الصغير الذي يؤدي إلى شارع بنايتها وهو يقول بنبرةٍ هادئة:.

أنا مش هقولك حاسس بيكِ، بس هقولك إني عيشت اللي عيشتيه لما أمي بتوحشني يا قمر، دا إذا كانت مش وحشاني علطول، بس أرجع وأقول إني بحبها والحمد لله على قدره، ماتت صابرة ومسلمة وعمرها مازعلت حد منها، وموصياني إني أكون راجل مسلم ومؤمن بالله، ملتزم دينيًا، عزائي الوحيد إني طمعان أشوفها في الجنة، طمعان إنها تكون سبقتني على هناك زي ما سبقتني في الدنيا، وهناك بقى أنا هكون معاها علطول من غير فراق، أدعي يا قمر أدعي ربنا يرحمه ويجمعك بيه في جنته واحمدي ربنا إنه عوضك برجوع يوسف من تاني.

سحبت نفسًا عميقًا توقف من خلاله عبراتها المنسابة على وجنتيها ثم قالت بنبرةٍ مختنقة:
وعوضني بيك أنتَ كمان.
ابتسم لها حينما توقف أسفل البناية ولمحته هي لتسأله هي بلهفةٍ وقد شوشت العبرات على رؤيتها الصحيحة:
إيه دا! أنتَ واقف تحت؟
رد عليها مؤكدًا بنبرةٍ هادئة وهو يدعوها للنزول:
آه، وعاوزك تنزلي لو ينفع يعني.

أغلقت معه على الفور وسحبت إسدال الصلاة الخاص ب ضُحى التي راقبتها بعينين ضيقت هي جفونهما حتى ضحك عُدي عليها وقال بسخريةٍ:
أوعدنا يا رب، أوعدنا بالبرطعة يمين وشمال.

تركتهما هي ونزلت من الشقة فوجدته في مدخل البناية ينتظرها بالأسفل وما إن رأته ركضت عليه تحضتنه فيما سكت هو تمامًا وأحتوى صمتها بين ذراعيه مُربتًا فوق ظهرها، منذ أن أصبحت زوجته وهو يتقبل كل حالاتها وكل حزنها، لذا أبتعد عنها ثم أمسك كفها وهو يقول بنبرةٍ هادئة:
تعالي معايا شوية وهرجعك تاني.

نظرت لنفسها وهي ترتدي إسدال الصلاة، والحقيقة لم يكن بيتيًا بمعناه الحرفي إنما كان عبارة عن عباءة باللون الأسود رقيقة وفضفاضة على الجسد والحجاب بنفس اللون معه موجات من لونٍ أخر يمتزج معه، أبتسم لها أيوب ثم رفع كفه يخفي مقدمة الخصلات التي ظهرت ثم هتف بنبرةٍ ضاحكة:
زي القمر والله، اسم على مسمى.

قبل أن ترد عليه أمسك كفها يسحبها معه ثم سار بها وهي بجوارهِ تطالع كفيهما المتعانقين معًا وكأن كلًا منهما يحتمي في الأخر فيما تحرك هو معها في الشارع وقد وقف أمام أحد المحلات الموجودة ومختصة بصنع الحلويات ثم سألها بنبرةٍ هادئة:
بتحبي الشوكلاتة أكتر ولا الكريمة!
فرغ فاهها ورفرفت بأهدابها عدة مرات لتجده يقول مُخمنًا بنبرةٍ ضاحكة:
شكلك من اللي بيحبوا الشوكلاتة، هجيبلك على ذوقي.

انتقى قطعتي حلويات له ولها بنكهة الشيكولاتة ثم مد يده لها بالحلويات وهو يبتسم حتى ابتسمت هي الأخرى وسألته بتعجبٍ:
ودا اسمه إيه بقى؟
حرك كتفيه ببساطةٍ وهو يقول بنبرةٍ هادئة:
اسمه إني مش عاوزك تنامي زعلانة، ومش عاوز آكل حاجة جديدة من غيرك، قوليلي طعمها عامل إيه؟

ضحكت بسعادةٍ على مشاركته لها ثم أخذت ملعقة منها تتذوقها حتى أغمضت عينيها لوهلةٍ تستمتع بالمذاق الرهيب، لم يسبق لها أن تتذوق مثل هذه الحلويات في السابق لذا ما إن تذوقتها شعرت بسعادة غامرة وقد تأكد هو من ذلك، ثم جلس معها يتناولا الحلويات سويًا وما إن انتهيا أشار لها أن يعودا من جديد للبيت.
سارت معه بحالٍ تبدل كليًا حتى وصلا معًا فسألها هو باهتمامٍ جليٍ عن حالها بعد رؤيته:.

طمنيني بقى دلوقتي لسه زعلانة؟
حركت رأسها نفيًا ثم هتفت بتأكيدٍ:
أصلًا من أول ما شوفتك حسيت إني متطمنة أوي، عارف؟ لما خدتني دلوقتي وقعدنا مع بعض أنا حسيت إني مبسوطة وهقولك حاجة تانية؟ يمكن كل حاجة حصلت علشان أجي هنا وأشوفك وتشوفني وأكون مراتك، فأكيد الحكمة من حياتنا اللي اتبدلت دي هي إني أجي هنا زي ما يوسف جه هنا ولاقى مراته، شوفت أنا شاطرة وتفكيري حلو إزاي؟

أومأ لها مبتسمًا ثم هتف بنبرةٍ هادئة يُطمئنها بقوله وطريقته المعتادة التي تنقذ النفس من الهلاك على يد صاحبها:.

بالظبط، زي ما بنحب الراحة والنعيم لازم نشكر ربنا على البلاء والحزن، لأن رحمة ربنا بالقلوب شيء مؤكد واستجابة الدعاء شيء مؤكد برضه، بس كل الحكاية إن الإنسان مش بيقوي عزيمة نفسه، سايبها للدنيا تلعب بعقله، بس زي ما قولتي، حكمة ربنا، فلو أدرك العبد حجم الخير من البلاء لكان أحبه وسلم الأمر لله بكامل عقله، فسبحان الله وإن مع العسر يسرًا، والحمد لله على كل شيءٍ كنا بشرور أنفسنا نجهل حكمته.

حركت رأسها موافقةً له وهي تطالعه بامتنانٍ فمد يده له بالحقيبة التي جلبها لعائلتها وهي أيضًا معه ثم أمسك وجهها بين كفيه ولثم جبينها وهتف يمازحها بقوله:
اضحكي بقى يا صبر أيوب.

ضحكت له قبل أن يرحل ثم دلفت المصعد وما تحرك بها خرج من البناية عائدًا إلى بيتهِ وهو يتنفس بعمقٍ، في الحقيقة هو من كان يحتاج لهذا الوقت برفقتها، كان يحتاج لحديثها الغريب التلقائي وضحكتها التي تظهر فجأةً تزيل العبوس عن وجهه قبل وجهها، ثم عاد إلى بيتهِ لكن قبل ذلك مر على المكان من جديد يجلب لأهل بيته معه ومن فيهم زوجة شقيقه.

أسدل الليل ستائره كُليًا وتجاوز المنتصف أيضًا وقد عاد نَعيم ومعه جودي إلى البيت برفقة إسماعيل و مُنذر معهم وتركوا إيهاب في المشفى برفقة سراج الذي أصر على رحيل الجميع من المشفى وكذلك نور.
خرجت سمارة نحوهما بلهفةٍ لعلها تراه بينهم لكن الإحباط أصابها حينما وجدتهم حتى ذلك الغريب معهم وهو ليس هنا، لذا سألت بنبرةٍ مُحبطة:
هو سي إيهاب مجاش معاكم؟
هتف إسماعيل بأسفٍ لها:.

لأ يا سمارة مجاش، مرضيش يسيب سراج لوحده وخاف أفضل معاه لوحدي، والمستشفى قالت مرافق واحد، بس بكرة هيخرجوا يعني، المهم بيقولك اطلعي الشقة وأقفلي على نفسك وافتحي موبايلك.
حركت رأسها موافقةً ثم سألت بقلة حيلة وقد تمكن منها الضيق بسبب مشاجرتهما الأخيرة واحتدام النقاش بينهما:
طب أحضرلكم العشا!
هتف نَعيم بنبرةٍ منهكة كُليًا:.

لأ أنا مش قادر يدوبك أغفل شوية قبل الفجر علشان نشوف بكرة الجمعة يمكن حد من التجار ييجي مع إني مش فايق و إيهاب مش هنا.

أخذت الصغيرة النائمة على كتف إسماعيل ثم استأذنت منهم ورحلت نحو شقتها ثم أغلقت البوابة الحديدية الخاصة بالبناية وصعدت إلى شقتها فورًا بخيبة أملٍ، دلفت الشقة ومنها للغرفة مباشرةً ووضعت الصغيرة على الفراش ثم احتضنتها بين ذراعيها وللحق لأول مرة منذ أن دلفت هذه البناية تشعر بالخوف بدونهِ.

كان سراج جالسًا على الفراش شاردًا فيها، مُعذبة قلبه صاحبة السُلطة ومالكة الأمر، تلك التي أعطته الحياة حينما هتفت جملتها التي عادت له بكل الأمل حينما أخبرته عن رحيلها وكأن سمعه يتعلق بالجملة من مدى حلاوتها:
في داهية كل حاجة المهم أنتَ عندي، الشغل مش أهم من حياتك ووجودك يا سراج.

استلذ الجُملة التي هتفتها بصدقٍ رآه هو في عينيها التي نطقت بالخوف والألم والحزن عليه، حتى أنه رأى الندم أيضًا، سحب نفسًا عميقًا ثم فتح هاتفه يُراسلها وقد كتب لها بسرعةٍ:
صاحية يا نور؟
جاءه الرد منها في الحال وكأنها كانت تنتظر مراسلته:
صاحية، طمني أنتَ كويس؟

ابتسم فور رؤيته لردها ثم ظل يكتب لها وهي ترد عليه وكلًا منهما يطمئن على صحة الأخر وحينما طلب أن يهاتفها لاحظ نوم إيهاب فحمحم بخشونةٍ ورفع صوته يوقظ الأخر الذي طالعه بعينين ناعستين حاول فتحهما على مضضٍ ليصله صوت الأخر قائلًا:
عاوز أشرب شاي، هاتلي من برة.
رفع إيهاب أحد حاجبيه وردد مستنكرًا:
شاي! تصدق بالله لولا إننا في مستشفى كنت قولتلك كلمة ميصحش تتقال! أنتَ فيه حاجة في راسك يالا؟

زفر سراج ثم هتف بنبرةٍ جامدة:
هو مش أنتَ قاعد هنا علشان تخلي بالك مني؟ أنا عاوز شاي وحاجة خفيفة معاه طالما مفيش سجاير بقى.

تركه إيهاب وهو يسب من بين شفتيه بسبة نابية ويغمغم حُنقًا على سراج الذي أنتظر خروجه ثم هاتفها على رقمها لكي يتحدث معها، أما الآخر فخرج من الرواق الرخامي ذاهبًا إلى ركن المشروبات وقد تذكر أمر زوجته وأمر مشاجرته معها لذا تحرك أولًا يجلس على المقعد الحديدي ثم فتح هاتفه يطلب رقمها حتى جاوبت هي بمعاتبةٍ:
طول اليوم مش راضي تسأل فيا كدا؟ ولا كأني ليا لازمة حتى لما كلمتني علشان جودي كلمتين ورد غطاهم؟

مسح وجهه بكفهِ بعنفٍ ثم هتف بقلة حيلة:
علشان مش بتمسعي كلامي يا بنت الناس، فرح إيه دا اللي أخليكي تروحيه؟ قولت مرة لأ ومرة تانية لأ، بتعاندي ليه؟ بعدين أنتِ الأفراح دي بتكون عاملة إزاي، من أولها قولتلك يا سمارة إنك طالما بقيتي مراتي يبقى مفيش مخلوق ينفع يرفع عينه فيكِ.
هتفت بحنقٍ ردًا عليه بعد حديثه:.

يعني أنتَ عاوز تعصبني وخلاص؟ أنا كنت هنام، دلوقتي دمي اتحرق ومش هنام بقى، الله يسامحك يا شيخ، كفاية خايفة علشان مش هنا.
ضحك رغمًا عنه وكأن الضحكة تزاحم الوجوم على وجهه لتعلن عن نفسها فهتف بنبرةٍ أهدأ من السابق:
أنا يعز عليا زعلك علشان كدا هراضيكي، مش هوديكي الفرح ومش عاوز نقاش خالص.
زفرت هي بقوةٍ فوجدته يضيف من جديد بنبرةٍ أقوى:.

أستني أخلص الأول، مش هوديكي الفرح بصحيح بس مقابل دا هوديكي اليوم دا من أوله لأخره عند عهد و قمر و ضُحى تقضي اليوم كله معاهم ومعاكِ جودي كمان، مش كدا أحسن بقى من الفرح والدوشة والقرف؟ إيه قولك يا عمنا؟
شهقت تلقائيًا بفرحةٍ وسألته بحماسٍ شديد فور استماعها لاقتراحه:
بجد يا سي إيهاب!
ضحك لها في الهاتف وقال بنبرةٍ ضاحكة:.

علشان خاطر سي إيهاب بجد والله، يلا روحي نامي وخلي بالك من نفسك لحد ما أجيلك بكرة وتصبحي على خير يا سمارة وخلي بالك من جودي.

أغلق معها الهاتف ثم وقف بجوار صانع المشروبات يخبره بطلبه ثم أخذ للأخر مخبوزات مغلفة حتى يتناولها مع الشاي، فيما فرحت الأخرى بشكلٍ بالغٍ ثم ضمت الصغيرة بين ذراعيها أكثر وهي ترتجف من الحماس وتهز كتفيها بفرحةٍ غريبة، لكن السبب الأساسي هو أنه لم يقبل حزنها ويعمل جاهدًا على تبديل حزنها.

في صباح اليوم التالي.
امتلأت الشوارع بالناس يوم الجمعة قبل الذهاب إلى المساجد ملبيين الجواب لأمر ربهم، ذلك اليوم المبارك الذي يعرف بالعديد والعديد ويظل أيوب يحدثهم عن فضله في خطبة الجمعة، وتحديدًا بعد حديثه عن يوم الجمعة هتف بنبرةٍ قوية رغم هدوئها قائلًا:
السلام عليكم ورحمة الله وبركاته،.

بارك الله لنا وبارك في رزقنا، وعلمنا وعملنا، فاللهم إنا نسألك أن تستخدمنا ولا تستبدلنا، وأن ترزقنا النفع بما علمتنا.
آمن الجميع خلفه ليبدأ هو الحديث عن فضل الدعاء بقولهِ الذي بدأ كعادته بنفس الدباغة الروتينية:
فبسم الله الرحمن الرحيم، والصلاة والسلام على سيدنا محمد خاتم الأنبياء وأشرف المرسلين، وأما بعد.
فقد قال الله جل علاه في كتابة العزيز:.

وَقَالَ رَبُّكُمُ ادْعُونِي أَسْتَجِبْ لَكُمْ إِنَّ الَّذِينَ يَسْتَكْبِرُونَ عَنْ عِبَادَتِي سَيَدْخُلُونَ جَهَنَّمَ دَاخِرِين.

إن الدعاء هو عبادة لله سبحانه وتعالى، فأنتَ يا مؤمن بتبخل على نفسك بالدعاء وبتبخل بالعبادة الخالصة لله سبحانه وتعالى، ربنا بيقول ادعوني فعل أهو، ونتيجته استجب لكم هيستجيب للدعاء، أنتَ بقى بتدعي إزاي؟ بتدعي من باب الواجب وخلاص؟ ولا من باب اليقين؟ يعني بتدعي وأنتَ بكل جوارحك عارف إن الدعاء هيستجيب، طب لو ربنا مستجابش، يبقى هيرزقك العوض عن دعائك، طب لو مجاش طلب الدعاء في الدنيا، هييجي في الآخرة، ذنوب وابتلاءات تم رفعها عنك مقابل دعواتك، بس أنتَ ادعي، ادعي علشان متأكد إن الدعاء هو السبيل الوحيد.

سكت لوهلةٍ ثم بدأ الحديث من جديد متابعًا:
من شروط الجواب للدعاء، أن يستقر اليقين في قلب الداعي، بتدعي وأنتَ متأكد إنك هتاخد نتيجة الدعاء، أدعي وعامل ربك في الدعاء باليقين يناولك ربك ما ظننته المستحيل، ربنا معندهوش مستحيل، بس أنتَ مزرعتش في نفسك اليقين، أدعي واتكلم وأطلب من ربك ما شيئت، أدعي باللي كل الناس قالوا عليه من سابع المستحيلات، لأن سيدنا محمد قال:.

إن الله حييٌ كريمٌ، يستحي من عبده إن يرفع إليه يديه فيردهما صفرًا خائبتين
يعني ربنا أكرم من أنه يردك خايب الرجا، حاشاه، لكنه الكريم فإذا أنتَ يا مؤمن عاملت ربك باليقين رزقت بالمستحيل، أدعي لأن الدعاء عباده، فلما تيجي تقولي يعني مش عارف إن المشكلة فضلت كتير وبتاع وتفضل تثبط في عزيمة نفسك هقولك ربنا سبحانه وتعالى قال في كتابه العزيز:.

هُنَالِكَ دَعَا زَكَرِيَّا رَبَّهُ قَالَ رَبِّ هَبْ لِي مِن لَّدُنكَ ذُرِّيَّةً طَيِّبَةً إِنَّكَ سَمِيعُ الدُّعَاءِ
سيدنا زكريا عليه السلام دعا ربه بكل يقين لأنه متأكد إن ربنا سميع الدعاء وعليم بالقلوب، فتيجي تسألني طب هو دعا ربنا ليه؟ ما عادي يمكن يكون مش بيخلف، ماهو الشيطان مش هيسيبك، هيلاعبك وهو شاطر.
قالها بنبرةٍ ضاحكة ثم استعاذ بربه من شيطانه وأضاف من جديد متابعًا بعدما استعاد ثباته وهدوئه:.

قَالَ رَبِّ أَنَّى يَكُونُ لِي غُلَامٌ وَكَانَتِ امْرَأَتِي عَاقِرًا وَقَدْ بَلَغْتُ مِنَ الْكِبَرِ عِتِيًّا.

فنسأل احنا بقى بأي يقين دعا سيدنا زكريا؟ وبأي قلبٍ تمسك بدعائه رغم استحالة الأسباب؟ اللي هي وضحها سيدنا زكريا لما وضح المستحيل إن زوجته عاقرًا يعني مش بتخلف، وحط الرجاء اللي هو مرتبط بالمستحيل وهو الغلام لكن في النص حط الدعاء بين المستحيل والرجاء وهي كلمة هُب لي يعني اعطيني، وسيدنا زكريا لما رأي الرزق عند مريم رغم استحالة الأسباب قام بالدعاء:
قَالَ رَبِّ هَبْ لِي مِن لَّدُنكَ ذُرِّيَّةً طَيِّبَةً.

دا معناه انه لما نشوف رزق عند حد عادي جدًا بل ومستحب ندعي ‏باستبشار أن يرزقنا الله بمثله ويكون عندنا يقين بإجابة الدعاء، لكن سيدنا زكريا مع الدعاء واليقين توجه للمحراب يصلي ويدعو الله وشكى حاله إليه وأخذ يسبحه بالليل والنهار فإذا بإجابة الدعاء، في قوله تعالى:
أَنَّ اللَّهَ يُبَشِّرُكَ بِيَحْيَى
يَا زَكَرِيَّا إِنَّا نُبَشِّرُكَ بِغُلَامٍ اسْمُهُ يَحْيَى لَمْ نَجْعَل لَّهُ مِن قَبْلُ سَمِيًّا.

أي بشره الله تعالى على يد الملائكة ب يحيى وسماه الله له يحيى وكان اسمه موافقًا لمسماه: يحيا حياة حسية، فتتم به المنة، ويحيا حياة معنوية، وهي حياة القلب والروح، بالوحي والعلم والدين، فمهما كنت تظن الأمر مستحيلًا أدعي ربنا بكل يقين وأمل، أدعي وكأنك لا تملك سوى الدعاء، حتى وإن كنت صاحب فعل، فألزم الدعاء وتذكر قول الله تعالى:.

قال النبي: ادعوا الله وأنتم موقنون بالإجابة، واعلموا أن الله لا يستجيب دعاءً من قلبٍ غافل لاهٍ.

يعني تتيقن من إجابة الدعاء وخليك عارف الدعاء لا يستجيب من قلب غافل، يعني مش متيقن من الدعاء، بل بيدعي من باب الواجب، تذكر إن الدعاء عبادة لله سبحانه وتعالى، فلما تدعي أنتَ كدا بتعبد ربك عبادة بدون مجهود، بل بتقوم بدورك كمسلم وهو التسليم لله سبحانه وتعالى، لأن ربك رب قلوب مطلع عليها، واللهم إنا نسألك إجابة الدعاء، فاللهم:
اهدِنا فيمَن هَديْت وعافِنا فيمَن عافيْت وتَوَلَّنا فيمَن تَوَلَّيْت.

و بارِك لَنا فيما أَعْطَيْت وقِنا واصْرِف عَنَّا شَرَّ ماقَضَيت سُبحانَك تَقضي ولا يُقضى عَليك انَّهُ لا يَذِّلُّ مَن والَيت وَلا يَعِزُّ من عادَيت تَبارَكْتَ رَبَّنا وَتَعالَيْت فَلَكَ الحَمدُ يا الله عَلى ما قَضَيْت وَلَكَ الشُّكرُ عَلى ما أَنْعَمتَ بِهِ عَلَينا وَأَوْلَيت نَستَغفِرُكَ يا رَبَّنا مِن جمَيعِ الذُّنوبِ والخَطايا ونَتوبُ اليك وَنُؤمِنُ بِكَ ونَتَوَكَّلُ عَليك و نُثني عَليكَ الخَيرَ كُلَّه أَنتَ الغَنِيُّ ونحَنُ الفُقَراءُ اليك أَنتَ الوَكيلُ ونحَنُ المُتَوَكِّلونَ عَلَيْك أَنتَ القَوِيُّ ونحَنُ الضُّعفاءُ اليك أَنتَ العَزيزُ ونحَنُ الأَذِلاَّءُ اليك.

اللهم أنصر إخواننا المستضعفين في فلسطين وسوريا والسودان، اللهم أنصر الإسلام والمسلمين، وأعز الإسلام والمسلمين، وجندهم بجندٍ من سمائك يا ولي المؤمنين.
ترقرق الدمع في عينيه كدليلٍ على نقاء فطرته والناس يرددون خلفه فيما أعلن هو عن قيام الصلاة وبدأ من جديد صلاة الجمعة بعدما أنهى الخطبة والدعاء.

أنهى يوسف الصلاة بالمسجد خلف أيوب وتوجه مباشرةً من الحارة راحلًا منها إلى سراج في المشفى حتى ينقله إلى البيت بعدما أصر الأخر على الرحيل وقد طمئنه الطبيب أن الأشعة الطبية لم يكن بها أي خطورة بل فقط يتوجب عليه مراعاة حركاته، وقد وصل إليه يوسف الذي وجد معه إيهاب و مُنذر أيضًا الذي أتى بأشياء الأخر لكي يبدل ثيابه.

دقائق مرت عليهم لخروج سراج الذي بدا مثل الأسود لم يهزه ما حدث، مجرد عيار ناري عابر دلف جسده وخرج من جديد، من الأساس واجه العديد من المخاطر مثل هذه، وبعد مرور ساعة تقريبًا وصل لبيت نَعيم برفقة الشباب فقام إسماعيل بمعاونته وأجلسه على الفراش ووقفت تحية تطمئن عليه بعدما وضعت الطعام أمامه وقال هو بامتنانٍ لها:
ألف شكر يا ست تحية تعبتك معايا.

ابتسمت له وهي تربت على ظهره ثم ركضت له جودي تحتضنه وتطوق نصف جسده بذراعيها أما إيهاب فوقف يبحث عنها بعينيه حتى لمح طيفها على أعتاب الغرفة وقد مرت نحو المطبخ، انسحب من أمام الجميع وسار خلفها حتى وجدها توليه ظهرها فوقف خلفها يفعل حركته المعتادة وهو يضم خصرها بكلا ذراعيهِ ويضع رأسه عند كتفها ثم هتف بنبرةٍ هامسة داعبت أوتار فؤادها بمعزوفة خاصة لأجلهِ:
وحشتني يا عمنا.

ابتسمت دون حديثٍ لتجده يقوم بتدويرها ثم سألها ساخرًا:
مفيش وأنتَ كمان؟ مفيش وحشتني؟ مفيش معرفتش أقعد من غيرك؟ مفيش أي حضن أو بوسة تصبيرة كدا طيب؟
ضربته في كتفه لكي يكف عن وقاحته فوجدته يضيف بنبرةٍ هادئة وهو يغازلها بها:
يمين بالله أنا ما مصبرني على هدة الحيل دي غير إنك موجودة، فخلصي يا حلوة هنا كدا ولمي الدور علشان عاوزك فوق على رواقة، هروح بس أشوف ابن عمي دا وأجيلك تاني.

قبل أن يتحرك من أمامها أمسكت قميصه تردع حركته بذلك وهي تسأله بسخريةٍ:
خد هنا! إزاي يبقى عندك ابن عم ومتقوليش؟
حرك رأسه يقترب منها بخبثٍ وهو يقول بنبرةٍ هامسة:
طب ما أنا عاوزك علشان أقولك بس الموضوع عاوز شرح كتير أوي، لأنه مهم جدًا وكبير أوي ميخلصش في كلمتين كدا.
طالعته بنصف عين وهي تسأله بشكٍ:
أنتَ بتشتغلني صح؟ بتاكل بعقلي حلاوة؟
أشار على نفسه مستنكرًا بسخريةٍ وهو يردد:
أنا! أنا عمري كلت بعقلك حلاوة؟

ضحكت بتهكمٍ ثم أضافت بسخريةٍ منه:
أنتَ! دا أنتَ تاكل بيه مال اليتيم مكان مش الحلاوة بس، روح شوف كدا وراك إيه لحد ما أخلص هنا وأجيلك.
قربها منه من جديد يقول بنفس الخبث:
طب فكري كدا! مش عاوزة تديني أي حاجة خالص؟
دلف في تلك اللحظة نَعيم يهتف بتهكمٍ:
هتديك فوق دماغك، يلا ياض أطلع غير هدومك دي علشان فيه تجار جايين كمان شوية، واخلص وسيبك من قلة أدبك دي بقى، عيل بجح مش وش خِشا.

ابتعد عنها إيهاب على مضضٍ ورد عليه بضجرٍ:
أنا برضه اللي مش وش خِشا! ماشي.
سار مع نَعيم للخارج فيما ضحكت هي عليهما ثم استأنفت عملها لكن هيهات كيف ستكمل بنفس الثبات بعدما أتى صاحب الزعزعة الأساسية لسكونها، يعاملها دومًا كما يعامل خيولهِ، يثير فضولهم من مرقدهم لينجذبون له ثم يرحل كأنه لم يفعل أي شيءٍ ومن الأساس هو فاعل كل شيءٍ.

في الخارج لاحظ إيهاب غياب الإثنين عن عينيه فسأل عنهم ميكي الذي أخبره بنبرةٍ هادئة:
موجودين عند الخيول يا عمهم.
دلف حيث إشارة الأخر فوجد يوسف يسأله بسخريةٍ:
ناوي تتكلم إمتى ياعم الغامض؟ إيه حوار إنك ابن أخو الحج دا؟ إزاي وأنتَ ابن عم إيهاب!
عقد إيهاب مابين حاجبيه بدهشةٍ حتى ظن نفسه مارًا بأحد العوالم الموازية لسائر البشر، فوجد مُنذر يمسح وجهه بكلا كفيهِ معًا ثم قال بنبرةٍ مُحشرجة ذات بحة هادئة:.

كل الحكاية إن شوقي الحُصري كان متجوز في السر، ولما مراته حملت مرضاش يعترف بيا وطلب منها تخلص عليا وتنزلني، بس هي خافت وراحت ل ماكسيم اللي كان ساعتها ليه سُلطة على شوقي وهو خلاها فهمته إنها نزلت العيل وخدها يجوزها ل إبراهيم الموجي ومنه يربي الواد اللي هو أنا وأبقى تحت رعايتهم، بس الغريب بقى إن إبراهيم زهق مني فرجعني تاني ل ماكسيم اللي خدني عبد عنده.

اندهش يوسف من الحديث بأكملهِ وبدا مستنكرًا ومُستغربًا لما يُقال ولم يختلف عنه كذلك إيهاب في الخارج الذي شعر بهزة في قلبهِ ولم يمنع نفسه من الدخول لهما وهو يسأل بتعجبٍ:
يعني أنتَ ابن أخو الحج! إزاي؟ طب وعمي ومرات عمي وأخوك كل دول كانوا إيه؟ إزاي محدش كان عارف؟
اندهش يوسف من جديد بسبب حضور إيهاب أمامهما بينما مُنذر فزفر مُطولًا ثم هتف مؤكدًا:.

آه، واللي أنتَ متعرفهوش إن ماكسيم عارف كمان وسايبني هنا لحد ما ألاقي ابن عمي وساعتها بقى الله أعلم باللي ممكن يعملوه، وعلى فكرة أنا مجرد ما أوصل للي هو عاوزه هيموتني، لأني ماسك كتير عليه، أو عليهم كلهم، وعلى فكرة سامي السيد جوز عمة يوسف هو اللي عارف مكان ابن نَعيم أو بالأحق يعني عارف المكان اللي يوصلنا بيه، لأنه للأسف أتخلص منه، . أنا بدور على إبرة في كوم قش.

نظرا الإثنان له بدهشةٍ وخاصةً يوسف الذي قال بنبرةٍ ضائعة كُليًا:
سامي! وهو إيه علاقته بكل دا؟
هتف مُنذر بثباتٍ من جديد أو هكذا حاول أن يتصف:
علاقته أنه أتعرف على شوقي وجمع بينهم شغل الآثار من زمان أوي، وكانت النتيجة إن فيهم واحد سمع كلام التاني وضيعوا عيلين في الدنيا كأنهم ازايز مياه بتترمي في الزبالة، وعلى فكرة أنتَ كان زمانك زيي يا يوسف.
حرك رأسه بتعجبٍ له يسأله بعينيه ليفسر الأخر بقولهِ:.

لما دخلت الأحداث سامي كان متفق مع ماكسيم أنه ييجي يخرجك منها بس ياخدك برة وقصادك كدا يبقى خلص من عيلة مصطفى الراوي كلها بس الرحمة اللي ربنا كتبهالك إن نَعيم لحقك من هناك وباظت كل خطط سامي يعني كان زمانك معايا هناك يا قاتل يا مقتول.

فرغ فاه يوسف بغير تصديق وشخص ببصرهِ في الفراغ وكأن الحديث لازال يضرب بعقلهِ، لا يُصدق أن هذا المصير المجهول كاد أن يُكتب عليه، لقد ظن نفسه هنا مقتولًا من الأساس، فهل من المعقول أن يكتب له الموت لكن بدون رحمة؟ أما إيهاب فسأله باستغرابٍ شديد:
يعني إيه طيب؟ أفهم من كدا إيه يا مُنذر!
جاوبه الأخر بثقةٍ وثباتٍ لم يليقا بالموقف القاتل:.

أفهم أني لحد ما ألاقي اللي مني أنا هفضل زي ما أنا ابن عمك وبس، محدش يعرف حاجة غير كدا غيركم أنتوا الاتنين، أنا مش هرجع ولا حد هيعرف أنا مين إلا لما الاقي ابن عمي، علشان بظهوره كل حاجة هتتغير وكل الموازين هتتقلب، واللي متعرفهوش إني لحد دلوقتي شاكك في اتنين مجرد ما أتأكد إنه مش منهم أنا لازم أغير كل حاجة.
انتبها له من جديد وسأله يوسف بتعجبٍ:
مين هما!

وزع نظراته بينهما وقد هرب من النظر إلى إيهاب حينما هتف بثباتٍ حاول أن يبثه في الكلمات:
إسماعيل الموجي أو نادر سامي.
ضربة جديدة وقعت فوق رؤوسهما بمجرد ذكر الإثنين ليصرخ إيهاب في وجهه بحدة منفعلًا بقولهِ:
نعم يا روح أمك! بتقول مين؟ إسماعيل مين اللي ابن نَعيم! أنتَ جرى لمخك حاجة ولا بتطفح هباب أسود لحس مخك.
تدخل يوسف يقول باستهتارٍ جليٍ من الموقف بأكملهِ:.

بص يا مُنذر أنتَ شكلك كدا غلطان في العنوان، أكيد فيه حاجة غلط أو خطوطك داخلة في بعض، لأن الاتنين دول مستحيل يكونوا هما، نادر لو ابن نَعيم صدقني نَعيم بنفسه هيموته، غير كدا إسماعيل أخو إيهاب يعني كل التحليلات دي أكيد مضروبة.
لقد شعر مُنذر بالضيق من استهتارهما ومن التقليل بما يتحدث عنه لذا هتف بنبرةٍ جامدة منفعلًا هو الأخر في وجهيهما:.

أنا مش عاوز استهتار بكلامي، قولت بحط كل التحليلات علشان أقدر ألاقي طريق صح مبقاش زي اللي بيدور على إبرة في كوم قش، افرضوا طلع واحد من الاتنين؟ يعني هو سامي دا ميعملهاش وياخد ابن يربيه علشان ينتصر على عاصم ويكون عنده حد يشفط بيه الفلوس والشركة؟ ولا أشرف الموجي ميعملهاش ويبقى عنده عيل بيتاجر بيه مع المشايخ؟ لو بصيتوا هتلاقوا كلامي صح بس انتوا مش عاوزين تصدقوه، وأنا مش مستني حاجة من حد فيكم، بس هرجع حق عمي وابن عمي وياكش أموت بعدها مش فارق، أنا كدا كدا ميت.

هتف جملته الأخيرة بوجعٍ فيما أقترب منه إيهاب يقف أمامه وهو يقول بنبرةٍ جامدة يهدرها من بين أسنانه:
قول اللي تقوله بس حكاية إسماعيل دي تنساها خالص وتشيلها من راسك نهائي يا مُنذر أخويا محدش هييجي جنبه ولا حد يفكر يدخل في علاقتي بيه.
تدخل بينهما يوسف يهتف بنبرةٍ جامدة هو الأخر بعدما قلب حديث مُنذر في عقله:.

استنى بس يا إيهاب! الراجل بيتكلم صح، حقه إنه يدور على ابن عمه وحقه يرجع حقوقه كلها، أنتَ إيه اللي مضايقك؟ حتى لو مش أخوك مفيش حاجة في كل دا هتتغير.
صرخ في وجهه بوجعٍ بعدما انفجر كُليًا وكأنه فقد زمام أمر الخيول في ساحة عقله لتصبح كل حركاتهم مثل ركضهم بالحروب:.

مفيش حاجة هتتغير! أخويا اللي طلعت بيه من الدنيا ومفيش غيره ساند طولي عليه ممكن يطلع مش أخويا وتقولي مفيش حاجة هتتغير؟ دا معناه إنك بتقطع جدوري من الدنيا، أنا ماشي فاتح صدري في وش الحياة علشان إسماعيل أخويا، بكلامه دا بيقتلني يا يوسف، طب لو صدقتكوا، أكدب قلبي إزاي؟ إسماعيل دا حتة مني، مش بعد كل دا يطلع غريب عني، دا أنا أموت مقهور فيها دي.

انكسر صوته أمامهم عند الحديث عن شقيقه وقد لاحظ ذلك الإثنان معًا فاقترب منه مُنذر وهو يقول بنبرةٍ هادئة حينما قدر حجم مشاعره:.

أوعدك إن دا هيكون أخر حل ألجأ ليه بس حط نفسك مكاني، صدقني كلنا لازم نتوجع في الليلة دي كلها، فيه حد فينا هيتكسر جواه حاجات مش حاجة واحدة، أنا من ساعة ما عرفت حقيقة نسبي وأنا ابن مين وأنا دماغي اتشلت، مكسور وماليش حد، مفيش حد واحد أروح أقوله أني ضايع في الدنيا، مليش ضهر يسندني وأنا عايش حياتي كلها على كف عفريت، كل دا مش بايد حد فينا، إحنا نقطة في بحر عالم تاني، فيه أطفال أيتام في ملاجيء بيتباعوا كل يوم بالجملة زي حتت الهدوم، بيتحسبوا بالدستة، فيه ناس بتدخل مستشفيات عندها كسر في العضم بتخرج متاخد منها أعضاء، إحنا لازم نشكرهم إنهم سايبينا أحياء، ويا رب ابن عمي ميكونش اتباع بالحتت.

رفع يوسف كفيه يمسح وجههِ ثم هتف بصوتٍ أجش يحاول من خلاله إخفاء تأثره:
طب وأنتَ هتعمل إيه دلوقتي؟ هتروح فين؟
حرك مُنذر كتفيه بحيرةٍ وهو يقول:
أنا دلوقتي كدا مش قدامي غير إني أشوف مكان تاني أقدر أقعد فيه علشان أعرف إزاي أرتب الخطوات الجاية صح، هما كدا كدا هيراقبوني بس أهم حاجة أكون أنا مرتاح وعارف إن مكاني محدش هيقدر يدخله.
تدخل يوسف يقول بنبرةٍ هادئة وبذلك يعرض معاونته بدون أي تطفل عليه:.

أنا هاخدك مكان أمان، آمن حتى من قسم الشرطة وكل اللي فيه رجالة يتاخد بكلمتهم عهد متصدق عليه، حارة العطار.
طالعه إيهاب بحيرةٍ وسأله مستنكرًا ذلك وبشدة:
متأكد! مش عاوزين حاجة تحصله هناك تفتح العين عليه، مهما كان هو ملزوم مني، فكك من الهري اللي هراه من شوية دا.
هز رأسه مومئًا ثم أشار للأخر بقولهٍ أمرًا:
جهز حاجتك يا مُنذر يلا هتيجي معايا.

بعد مرور دقائق خرجوا معًا ليجدوا إسماعيل كاد أن يدخل لهم لكنه لم يلحق بهم حتى وجدهم أمامه ولاحظ نظرات شقيقه التي بدت على غير طبيعتها وكذلك مُنذر أيضًا، فيما أضاف يوسف بنبرةٍ هادئة:
هاخد منك مُنذر شوية يقعد في حارة العطار وهيبقى يرجع هنا لما أموره تتظبط شوية، أنا قولت أعرفك قبل ما تزعل.

تعجب إسماعيل من الحديث وفورًا تذكر أمر ضُحى، لوهلةٍ حركته غيرته وخشى أن يقع رفيقه في هواها كما سبق ووقع عليها فهتف بدون تعقل أو حتى ذرة تفكير:
طب أنا عاوز أجي أخطب ضُحى بنت خالك.
رفع إيهاب كفه يضرب به وجهه فيما نظر له يوسف بدهشةٍ وكذلك مُنذر الذي وأد ضحكته وطالع رفيقه بتعجبٍ ليجده يهتف من جديد بثباتٍ قاتل لمن يراه:
قولت إيه يا يوسف؟
وزع يوسف نظراته بينهم ثم قال باستهتارٍ وهو يهم بالتحرك:.

قولت روح نام شوية شكلك تعبان.
أوقفه إسماعيل من جديد وهو يقول بلهفةٍ:
أنا مش بهزر، أنا عاوز أجي بجد وطالب أيدها على سنة الله ورسوله يا يوسف.
لاحظ يوسف جديته وإصراره في الحديث لذا هتف من جديد يرد عليه بقولهِ:
خلاص هسأل أبوها وآخد منه معاد وهقولك.
حينها اندفع إسماعيل يسأله بلهفةٍ حماسية:
بجد! يعني موافق عليا!
ابتسم له وهو يمازحه بقولهِ:
وأنا هلاقي لأختي زيك فين يا حوكشة؟

قال حديثه ثم تركهم وتحرك نحو البيت ليضحك إسماعيل ثم جاوره شقيقه وكأنه طفل صغير تهور في مشاغبته ثم عاد بجوار والده يعتذر منه وقد هتف بآسف حقيقي:
أنا آسف شكلي ورطتك، بس هي مجاتش غير كدا.
ابتسم له إيهاب وقد تناسى ماحدث من قليلٍ وهو يقول:
مش مهم، المهم أنتَ مبسوط ومرتاح؟
حرك رأسه موافقًا عدة مرات مما جعله يرفع كفه يضعه على كتفه وكأنه يشدد من أزره بقولهِ:
ودا اللي يهمني يا إسماعيل إنك تكون فرحان.

وقف مُنذر يطالعهما مبتسمًا لطالما كانت هذه العلاقة دومًا من ضمن نقاط ضفعه، يحبهما معًا ويحب صدق مشاعرهما لبعضهما لذا ظل مبتسمًا حتى التفت له إيهاب وقال بنبرةٍ هادئة:
عقبالك لما تلاقي بنت الحلال أنتَ كمان.
ابتسم بسخريةٍ وقال بحديثٍ قاتم خرج من قلبٍ مقتولٍ:
وهي فين بنت الحلال اللي هتوافق بابن حرام زيي.

رمى جملته ثم ترك المكان يتبع رحيل يوسف هو الأخر فيما نظر الإثنان في أثره بدهشةٍ من طرفٍ وحزنٍ لأجله من طرفٍ آخر يعلم جيدًا مشاعر الشريد في هذه الدنيا بدون أن يكون له أي مكانٍ يرأف به أو يلتحد إليه من قسوة الطرق وبُعد الغاية وانعدام الرؤية.

جلس عبدالقادر برفقة الشباب في مندرة بيته وقد جمعهم معًا ليقول تَيام بنبرةٍ هادئة بعدما رتب الحديث جيدًا:
طب يا حج أنا كدا الشقة فاضل فيها بالظبط شهر وتخلص، أنا بستأذنك إني أكتب كتاب الفترة دي علشان أقدر أتحرك في فترة التجهيزات للفرح، قولت إيه؟
طالعه عبدالقادر بوجهٍ مبتسمٍ ليتدخل بيشوي هو الأخر يضيف بنبرةٍ هادئة:.

طب حيث كدا عاوزك يا كبيري تيجي معايا نحدد الفرح علشان جو خطوبة وعروستي وتلزيق مبحبش، أنا أهو استنيتك وعم ملاك جاي الأسبوع دا، هتيجي تجوزني؟
ابتسم له وحرك رأسه موافقًا ليظهر الحماس على وجوههم جميعًا فضحك أيهم وقال بسخريةٍ:
هترحرحوا! ربنا يكتبها لكل مشتاق.

فهم أيوب أن الحديث يخصه لذلك ضحك حينما ضحكوا على حديثه وكذلك الفتيات في الخارج بعدما وقفن يستمعن للحديث وقد أتت نِهال من خلفهما تحمحم لتلفت أنظار الثلاثة وعلى رأسهم آيات التي خجلت كثيرًا من نفسها حتى ضحكت لهن وسألت بنبرةٍ هامسة:
تقولولي بالهدوء كدا سمعتوا إيه ولا أدخل أقول أنا شوفت إيه؟

كانت الفرحة بداخل البيت تُنافي خارجه حيث كان الصغير في الخارج يلعب برفقة الصغار وقد ركض له أحد الصبية يبلغه بقولهِ خائفًا:
ألحق يا إياد مامتك فيه توكتوك خبطها ومحدش معاها في الشارع هناك، وهي عمالة تصرخ وبتجيب دم.
ركض الصغير نحو مكان إشارة الأخر وللحظةٍ نسى حزنه منها وحنقه عليها وعلى طباعها الحادة وركض بلهفةٍ نحوها وبراءة قلبه تقوده إلى أمهِ.

في منزل الراوي لاحظت مادلين انشغال ساكني البيت كلهم وغالبًا أهم أفراده بالخارج فتحججت بالاشراف على نظافة البيت بعدما وجدت فاتن تجلس برفقة ابنها الذي أخذ يطور علاقته بها مؤخرًا فيما خرج سامي و عاصم معًا لمقابلة أحد العملاء الهامين بالخارج، لذا صعدت بخلسةٍ تُجيد رسمها في طباعها ثم فتحت الغُرفة الأولى الخاصة ب سامي وأخذت منها مبتغاها المتمثل في فرشاة الشعر الخاصة بهِ.

خرجت من الغرفة بنفس الثبات بعدما وضعتها في جيب ردائها الشتوي ثم تحركت من جديد نحو غرفةٍ أخرى وتحديدٍ الخاصة ب نادر وقد أخذت الفرشاة الخاصة به وميزتها من لونها الأسود وعلمت أن صاحبة اللون الوردي خاصة بزوجته، وعلى ذكر زوجته استمعت لصوت المياه بداخل المرحاض فعلمت أنها بداخله حينها أخرجت هاتفها تكتب رسالة نصية مفداها:
اللي عاوزه معايا يا مُنذر.

أغلقت هاتفها ووضعته في جيب بنطالها وقبل أن تخرج من الغرفة تحديدًا وهي على أعتابها وجدت نادر أمامها بعدما فتح باب غرفته وسألها بنبرة جامدة أعربت عن دهشته الواضحة بوجودها في غرفة نومه:
بتعملي هنا إيه يا مادلين!

وقفت أمامه بنظراتٍ زائغة تزدرد لُعابها وهي تفكر في حُجة قوية تنطوي عليه وعلى تواجدها هنا خاصةً حينما توقفت صوت المياه في المرحاض وقد علمت أن الأخرى أنهت ما تفعله فحقًا إن كان الهلاك قد اقترب منها، فحتمًا ستلقى حتفها الليلة على أيد عائلة الراوي.