رواية غوثهم يا صبر أيوب ج1 للكاتبة شمس محمد الفصل العشرون
فليس كُل من صفيت له قلبه لك قد صفا.
عبارة قوية قالها الرافعي تَكشف لكَ أن ليس كل القلوب تحمل لكَ ما تحمله أنتَ لها، لكن قلبي يوم أن بكِ ألتقى تأكد أنه لكِ قد صفا، وعن أخطاء الحياة في حقه قد عفا، وأن المُر مهما طال سيتناسيه وكأنه عنه قد غفا، إن كان النصيب حكم لنا بالتلاقي، فأنا أتيتُ إلى مكانك وكأنني جسد رخو على سطح المياه قد طفا، فياليت كل ما قابلته لقلبي مثلما صفيت له قد صفا، وياليتكِ تسمعين قلبي وهو يخبرك: بأنه قد عفا.
ضحكوا على مُحي وبمجرد اختفاء أثره اندلعت النيران بالمكان كما لو أنها حالة حربٍ حتى فزع الشباب وانتفضوا من جلستهم يقفون مع بعضهم وفي وسطهم نَعيم الذي رفع صوته بصراخٍ:
فيه إيه؟ إيه ضرب النار دا؟ الرجالة فين؟
هتف يوسف بلهفةٍ:
الخيول. ليل.
انتبهوا لما تفوه به وقبل أن يأخذوا خطوة واحدة تجاه الخيول، وصلهم صرخة مدوية عالية باسم إيهاب لتتجه أبصارهم نحو مصدر الصرخة العالية وماهي سوى سمارة التي وقفت تبكي والسكين على عنقها، لتنتابهم حالة القلق والخوف، فصرخت هي ببكاءٍ:
ابوس إيدك الحقني يا إيهاب أنا مليش غيرك، الحقني.
هتف إيهاب بنبرةٍ جامدة يهدد الأخر بقوله:
لو لمست شعرة واحدة منها، يمين بالله لأكون دافنك مكانك.
هتف فتحي بنبرةٍ ضاحكة شامتة:.
اتكلم على قدك يا عَمهم مش خدت اللي عاوزه منها، خلاص حلو عليك لحد كدا، سيبلي أنا الباقي.
تدخل يوسف يقول بنبرةٍ جامدة وقد فقد أعصابه:
اتكلم على قدك أنتَ يا روح أمك، أنتَ عارف إنك حتى لو خدشتها بالغلط محدش هنا هيسمي عليك، مش يوسف الراوي اللي يسيب أخته لعيل زيك من غير حتى ما يربيك.
ضحك فتحي بهيسترية وهو يشدد وضع السكين على عنقها ثم هتف ببرودٍ آثار أعصابهم:
للأسف مش أنا اللي هعمل، أنا بخوفكم بس.
نظروا لبعضهم بترقبٍ وقبل أن ينطق أيًا منهم، ضحك فتحي من جديد ليقطع دهشتهم هذه صوت عيار ناري أصاب هدفه لتتسع الأعين بعدها ويهتف إيهاب صارخًا باسمها:
سمارة!
تشخصت الأبصار نحوها هي غافلين عن أي شيءٍ أخر ليتأوه فَتحي صارخًا بألمٍ وقد ارتخت مسكته لها لتقع على ركبتيها وقد شعرت بقدميها كالهلام الضعيف فركض لها إيهاب فور استقرار العيار الناري بذراع فَتحي من الخلف من فوهة السلاح الذي امسكه مُحي مُصوبًا عليه ثم التفت يُشهر السلاح في وجه رجال فَتحي هاتفًا بأنفاسٍ لاهثة:
لو حد فيكم فكر يتحرك خطوة ولا حتى دماغه تلاعبه هكمل عليه وأرميه زي كلاب السكك.
صرخ فَتحي الذي تألم وهو يحاول الضغط على كتفه ليركض كل من يوسف و إسماعيل نحو الرجال الذي كان عددهم أربع رجال، وانضم لهما مُحي هو الأخر فيما حمل إيهاب زوجته يرفعها نحو جسده هاتفًا اسمها بلوعةٍ وهو يرى جرح عنقها موضع السكين الذي سبق و وُضِعَ فوق عنقها، اقترب منه نَعيم يجلس على عقبيه يقول بنبرةٍ جامدة:
خدها على شقتك وخليك جنبها لحد ما أجيب دكتور ليها، قوم يلا متنحش كدا هي بخير وحاول تفوقها.
استفاق إيهاب بعد حديث نَعيم وحملها على ذراعيه بلهفةٍ يقترب بها من بناية شقته وقد ركضت له تحية تعاونه في هذا بعدما خرجت ورأت المعركة الدائرة بالخارج.
دلف إيهاب البناية بها بخطواتٍ شبه راكضة وقلبه ينبض بخوفٍ عنيف، فلأول مرةٍ يشعر بهذا الخوف منذ عدة سنواتٍ مرت نسى هو بها أنه يخشى على أحدهم، لكن هي الأمر عندها مختلف تمامًا.
في الأسفل اقترب يوسف بعينين مُظلمتين وقد انعدمت الرؤية أمامه وفقط كل ما يراه أمامه هو صورتها بالسلاح على عنقها ومحاولة ابتزاز فتحي لهم، لذا اقترب من الرجال أمسك أحدهم من تلابيبه ثم صفعه بالقلم على وجهه وأمسك تلابيبه يضربه برأسه، ولكن الأخر لم يكن ضعيفًا لذا رد الضربة ل يوسف في وجهه، وفتح سلاحه الأبيض في محاولةٍ منه لضربه لكن يوسف تفاداها حينما أرجع جسده للخلف وقد أحكم قبضته على الأخر ونزع منه السلاح هاتفًا بأنفاسٍ مُتقطعة:.
مبتتفتحش كدا.
سكت يفتح السلاح الأبيض من جديد ثم غرزه في كتف الرجل يهدر من بين أسنانه بغضبٍ تفاقم عن سابقه:
كدا يا حيلتها الضرب بيها كدا.
صرخ الرجل ليدفعه يوسف أرضًا وانتبه إلى مُحي الذي خنقه أحدهم بكفيه والآخر يحاول الإفلات من يده حتى اقترب إسماعيل يضع السلاح في رأس الرجل بعدما تخلص ممن كان بيده:
سيب وأنا سيب يا ريس.
رفع الرجل كفيه عن عنق مُحي باستسلامٍ ليلتفت برأسه نحو إسماعيل الذي ضربه في رأسه بظهر السلاح، وحينها تحرك يوسف يتابع فَتحي المُلقى أرضًا، يتألم حتى أوشك على فقدان وعيه، ومرر بصره حوله ليجد كلًا من إسماعيل و مُحي يتعاملان مع الرجال، فتنهد بعمقٍ ثم ضرب فتحي على وجهه هاتفًا بقسوةٍ:
قوم يا حيلتها، دا إحنا لسه بنقول يا هادي.
في حارة العطار أوقف أيوب السيارة أمام بيته ونزل منها بمفردها بعدما أوصل آيات إلى منزل تريز والدة بيشوي تجلس معهما هي والصغير الذي ودَّ زيادة أصدقائه.
نزل من السيارة ودلف البيت فقابلته وداد تهتف بلهفةٍ ما إن وقع بصرها عليه يدلف بهدوء:
ها طمن قلبي، عملت إيه؟
ابتسم لها برزانةٍ وهو يسألها:
أنتِ شايفة إيه؟
جاوبته بعدما تجولت بنظرها في وجهه البشوش وفور رؤيتها لملامحه المُنبسطة هذه، هتفت بصوتٍ غلفته البهجة:
شايفة إن ان شاء الله كدا قريب هنفرح كلنا، صح؟
حرك رأسه موافقًا وهتف مؤكدًا:
إن شاء الله، ادعيلي بس ربك يكرم وييسرها عليا.
رفعت كفيها تدعو الله بما أن يجمعه بما يريده هو، فيما أوشك هو على التحرك نحو غرفته فأوقفته بلهفةٍ من جديد:
بقولك صحيح، الأساتذة فوق مستنيينك.
انكمشت المسافة التي بين حاجبيه وردد مستنكرًا:
اساتذة! مين دول؟
هتفت بتفسيرٍ تعد على أصابعها:
الأستاذ أيهم ومعاه الأستاذ بيشوي ومعاهم الواد تَيام.
ردد خلفها بمرحٍ ساخرٍ فور نتعها الأخير بهذا اللقب:
الواد تَيام! دا إيه الرُتبة الغريبة دي؟
ضحكت على مزاحه وهتفت بخبثٍ:
شوف الروقان اللي أنتَ فيه دا؟ ربنا يديمه عليك.
تنحنح يُجلي حنجرته فسألته تغير الحديث حتى لا تتسبب في المزيد من احراجه وهي تعلم طبيعة شخصه:.
المهم هتطلع ليهم؟ ولا إيه؟
حرك رأسه موافقًا ثم قال بنبرةٍ هادئة وهو يلتفت ليدخل غرفته:
هصلي الأول ركعتين شكر لله وأطلع لهم، كفاية الذنوب اللي بشيلها في قعدتهم، مش ناقصة هي.
ضحكت على حديثه وسألته بتعجبٍ توقف استكمال حركته:
هتصلي ركعتين شكر؟ هي دي مش بِدعة يا أستاذ أيوب؟
عقد ما بين حاجبيه وردد باستهجانٍ:
بدعة؟ فين البدعة في صلاة وعبادة لربنا؟
حركت كتفيها كدليلٍ على عدم علمها بالأمر وظهر الخجل على ملامحها وهي تتحدث فيما لا تتأكد من مصداقيته، ليتنهد هو بعمقٍ ثم هتف بنبرةٍ هادئة يوضح لها حقيقة الأمر:.
صلاة الشُّكر ركعتان اثنتان، ويُسنُّ أداؤها نافلةً لله -تعالى- حمدًا له على حدوث النِّعَم أو زوال النِّقم، قال -تعالى-: (وَإِذ تَأَذَّنَ رَبُّكُم لَئِن شَكَرتُم لَأَزيدَنَّكُم وَلَئِن كَفَرتُم إِنَّ عَذابي لَشَديدٌ)، [1] وتجب الطَّهارة في صلاة الشُّكر؛ لأنَّها ليست مجرَّد سجود شكرٍ بل تتضمَّن الدُّعاء وقراءة من القرآن الكريم، وقد أخرج الإمام البخاري -رحمه الله- عن أبي هريرة -رضي الله عنه- أنَّ النَّبيَّ -صلى الله عليه وسلم- قال: (لا يَقْبَلُ اللَّهُ صَلاةَ أحَدِكُمْ إذا أحْدَثَ حتَّى يَتَوَضَّأَ).
يعني يا ست وداد دي صلاة لربنا عند الثناء والشكر له وليها فضل كبير طبعًا، و ورد إن سيدنا محمد
كان رسولُ اللهِ صلى الله عليه وسلم إذا جاء الشيءُ يُسرُّ بهِ خرَّ ساجدا شُكْرا لله تعالى.
يعني كان بيسجد شكر للمولى عز وجل وقد ورد عن المالكيَّة أنَّه يُستحبُّ أداء صلاةٍ من ركعتين شكراً لله -تعالى- وقد ورد أنَّ صلاة الشُّكر تُصلَّى ثمان ركعاتٍ استنادًا لما فعله رسول الله -صلَّ الله عليه وسلم- يوم فتح مكَّة، وقد ورد أنَّ هذه الصَّلاة هي صلاة الشُّكر والنَّصر، حينما ذهب إلى منزل أم هاني وقام بصلاة ثمان ركعات بعد انتصاره وتوفيقه، والله أعلم.
أبتسمت له بتقديرٍ وفخرٍ تلتمع عيناها به وهتفت بفرحةٍ:
الله يكرمك ويرزقك بكل خير، الله يرحمها والدتك لو كانت موجودة كان زمان قلبها بيرقص من فرحتها بيك، طلعت زي ما كان نفسها وأكتر كمان.
توقف عند ذكرها والدته ولمعت العبرات في عينيه تأثرًا بفقدانها لكن صوتها جال بسمعه في الحال وكأنها تجاوره وقد رفع كفه يمسد موضع قلبه تزامنًا مع بزوغ صوتها كما بزوغ الشمس في إشراقتها:.
بس أنا معاك علطول في قلبك قلبك الأبيض زي اللبن دا أنا جواه، واللي سكن القلب مهما غاب عن العين، موجود.
مرر كفه على قلبه وهتف بصدقٍ يؤكد حديثها:
وأنتِ لسه في قلبي زي ما أنتِ.
بعد مرور دقائق كان أيوب ساجدًا بعد انتهاء صلاته على سجادة الصلاة وهتف بصدقٍ من قلبه النقي الذي شهد الصفاء له بعينيها وكأنها اقتبست الصفاء الكامن بقلبه:.
اللهم لكَ الحمد كما بنبغي لجلال وجهك وعظيم سلطانك، الحمد لله حمدًا كثيرًا طيبًا مُباركًا فيه.
اعتدل بعدها جالسًا على ركبتيه يتنهد بعمقٍ بعدما سجد لله شكرًا على إكتمال خطوته الأولى، ثم اعتدل واقفًا يخرج من غرفته نحو الأعلى فوجدهم ينتظرونه وبمجرد مرور طيفه وظهور رائحته بالمكان رفعوا صوتهم بتهليلٍ:
ألف مبروك يا عريس!
ضحك لهم واقترب يجلس بجوار شقيقه اللذي سأله باهتمامٍ جليٍ في نبرته ولهفة ملامحه:.
ها طمني يا عم، اتيسرت؟
حرك رأسه موافقًا وهو يبتسم فاحتضنه أيهم مُربتًا فوق ظهره وهو يقول بفرحةٍ أعلنت عن نفسها فورًا:
مبروك يا حبيبي، عقبال الفرحة الكبيرة يا رب.
رد عليه أيوب وهو يربت فوق ظهره هو الأخر فاقترب منه بِيشوي يعانقه ويبارك له أيضًا ثم تَيام الذي قال بمرحٍ يثير استفزازه:
ألف مبروك يا شيخنا، المفروض تفكها علينا بقى.
سأله أيوب مُتعجبًا مما يقوله:
افكها عليك إزاي يعني مش فاهم؟
غمز الأخر له بعبثٍ يهتف بمرحٍ:
يعني مكالمة تليفون مرة، رسالة حلوة مرة، احنا بقينا زي بعض حس بيا شوية، أنا بنهار منكم.
فهم أيوب مايرمي إليه بحديثه لذا هتف بتهكمٍ:.
آه قولتلي، أنسى يا حبيبي، اللي ليك عندي بعد الخطوبة مكالمة كل يوم أخر النهار وأنا هسمعها بنفسي، وليك مقابلة كل جمعة في بيتنا هنا وأنا برضه هقف اراقبك، بصراحة أنتَ مش مضمون، ولو فيه أي شيء ضروري سواء في العفش أو الشقة تعرفني وأنا هقولها عليه وأرد عليك بنفسي.
حرك تَيام كتفيه وبسط كفيه أمامه ينطق بسخريةٍ:
طب ما ألبسك أنتَ الدبلة أسهل وخلاص، ليه نتعب البنت معانا، طالما هاخد رأيك في كل حاجة.
ارتفع صوت ضحكات الأخريْن فيما رفع أيوب حاجبيه بشرٍ جعل الأخر يخضع له بقوله مُذعنًا:
اللي تشوفه يا أيوب مش هكسر كلمتك.
شاطر يا حبيبي، دا لمصلحتك قبلي.
اقترب بيشوي من تَيام يهمس له بقوله:
دا لو عرف إنك بعتلها Add على الفيسبوك مش بعيد يبلكك من حارة العطار كلها.
هتف تَيام بنفس الهمس قائلًا ونظره مُثبتًا فوق أيوب:
أومال لو عرف اني بعملها ريأكتات على كل حاجة بتنزلها هيعمل فيا إيه؟
سأله الأخر بملامح ساخرة:.
المهم أخدت من عندها أي حاجة Share مشاركة؟
رد عليه بلهفةٍ قاطعة وكأن الأمر يشكل خطورة عارمة:
لأ يا عم استغفر الله العظيم، احنا فين هنا؟
كتم كلاهما ضحكته حتى لا يفتضح أمرهما خاصةً و أيوب يراقبهما وكأنه ينتظر أي خطأ منهما ليقوم ويبدأ بالقاء دروسه عليهما كعادته.
في منطقة نزلة السمان
دلف الطبيب شقة إيهاب الذي انتظره بقلبٍ يتأكل من فرط القلق على عكس ما يصدره لهم من ثباتٍ وقوة، لكن في الحقيقة ودَّ احتضانها والبكاء بخوفٍ عليها ضاربًا بأمر هيبته وهيمنته عرض الحائط، لكنه تريث وظل يتابعها بنظره وهي تمدد جسدها على الفراش.
دلف الطبيب واقترب من موضع تواجدها فاقترب إيهاب هو الأخر تلقائيًا يجاوره في الوقوف وهو يتابعه بعينيه دون أن يحيد بصره عنها وعن يد الطبيب الذي بدأ في وضع السماعة الطبية والكشف عليها، ثم بقياس الضغط في دمها، وراقب جرح عنقها، ثم التفت يُطمئنه بقوله:.
مفيش أي قلق، دي بس حاجة بسيطة من الخضة وتقريبًا زي ما الحج قالي إن حد كان مهددها، هي كويسة وكلها شوية وقت تفوق وتبقى زي الفل، وجرح رقبتها الحمد لله سطحي مش مستاهل قلق، يتطهر بس كويس وتحط مرهم وكله هيبقى تمام.
حرك إيهاب رأسه موافقًا وهو يتابعها بعينيه فوجد الطبيب يفتح حقيبته يُخرج منها المحلول الطبي فسأله بلهفةٍ حتى بدت نبرته خشنة بغير قصد:
إيه دا يا دكتور؟ بتعمل إيه؟
رد عليه مُعقبًا بحيرةٍ من اندفاعه بهذه الطريقة:
هعلقلها محاليل، هي أكيد محتاجة ليها.
تذكر إيهاب أمر ذعرها من هذه الإبرة وانهيارها فور رؤيتها بسبب ماضٍ يعمله هو جيدًا، لذا هتف بعدما تنهد بعمقٍ:
بلاش منها، مش دا بدل الاكل والشرب؟
هز الطبيب رأسه موافقًا فهتف هو بثباتٍ:
أنا هأكلها لما تصحى وأشربها كمان، بس بلاش المحلول علشان هي بتتعب منه الإبرة دي، متشكر يا دكتور.
تحرك الطبيب بعدما وافقه على حديثه ثم مد يده له بالروشتة الطبيبة التي دون بها اسم الكريم الطبي لجرح عنقها، ومعه أيضًا مضاد حيوي، بينما انتظر إيهاب خروجه ثم جذب المقعد يجلس بجوار الفراش يضم ذراعيه أمام صدره يراقب نومها وسكونها الغير معتاد فهو اعتاد على ثرثرتها وحديثها ووقاحتها معه، ابتسم بسخريةٍ وهتف بنبرةٍ مسموعة على الرغم من حزنه عليها:
أدي أخرة فصالك مع أم جنى كنتي هتضيعي مني.
في الأسفل نزل الطبيب وتوجه لحوش البيت فوجدهم يقفون بلهفةٍ باديةً على ملامحهم وسأله نَعيم بلهفةٍ:
طمنا يا دكتور؟ كويسة؟
حرك رأسه موافقًا وهتف بابتسامةٍ لعلها تبعث في قلوبهم الهدوء بعد فرط التوتر الذي ساد في الأجواء:
اتطمن يا حج، بخير الحمد لله، وكلها كام ساعة بالكتير وتفوق وتبقى زي الفل، وبالنسبة للجرح دا بسيط الحمد لله، ربنا يطمنكم عليها إن شاء الله، تؤمرني بحاجة تانية؟
رد عليه يوسف بثباتٍ:.
فيه واحد عاوزينك تطلع منه الطلقة، والله لو طلعت يبقى خير وبركة، مطلعتش يبقى نصيبه وقدره.
انتبه له الطبيب فأشار له يوسف بالسير معه مُضيفًا بلامبالاةٍ:
اتفضل معايا، شوف يستاهل تتعب نفسك ولا لأ.
بعد مرور دقائق دلفت تَحية الشقة تنادي عليهما حتى رفع إيهاب صوته يخبرها بالإتيان لهما فدلفت في يدها صينية طعام وقالت بنبرةٍ مُنهكة حزينة:.
دا أكل علشانها لما تفوق، يا حبة عيني مكالتش النهاردة وقالتلي أنها هتاكل معاك في شقتها، منه لله فتحي الزفت، مش عارف يسيبها في حالها تتهنى وهي يا حبة عيني ملهاش حد غيرك، ربنا يخليكم لبعض يابني.
ضُربت أسنانه ببعضهما من فرط ضغطه عليهما حينما تذكر ما مر منذ قليل ثم انتفض واقفًا يقول بإصرارٍ وعينيه ثابتتين في الفراغ بقسوةٍ:
معلش يا ست تَحية خليكي هنا معاها، هنزل تحت ضروري، متسيبيهاش غير لما أجيلك.
حركت رأسها موافقةً فوجدته يقترب من خزانته يفتحها ثم أخذ منها شيئًا لم تلتقطه عيناها، لذا تحرك هو بخطواتٍ واسعة لتتنهد هي بعمقٍ ثم جلست بقرب سمارة على الفراش تربت على رأسها وهي تمصمص شفتيها بشفقةٍ على هذه الفتاة الذي كُتِبَ عليها الشقاء منذ ولادتها.
نزل إيهاب بغضبٍ تفاقم عن ذي قبل وكأن حديث المرأة أعاد له ما فر من ذهنه ليعود له من جديد يذكره أنه حاميها الأول والأخير وأنه أعلن نفسه جيشها الوحيد، وحينما مر بالقرب من مكان جلوسهما قبل قليل حضر بذهنه حديثها وهي تقول:
ليا مين غيرك علشان أخاف عليه؟ مليش غيرك أنتَ كل حاجة ليا في الدنيا، أب وأخ وصاحب وجوزي وعزوتي، أنا حطيت فيك دنيتي كلها يا سي إيهاب ومعنديش استعداد أقف أشوف نفسي بخسرك حتى لو بتتوجع.
تنهد بثقلٍ ثم اقترب من اسطبل الخيول على الفور وهو يعلم الرجال هناك، لذا خبأ سلاحه خلف ظهره ثم دلف بغضبٍ لو أتيحت له الفرصة لقام بقلب المكان رأسًا على عقبٍ، دلف مرفوع الرأس فوجد الطبيب يخرج الطلقة من جسد فتحي الذي أخذ يتأوه بألمٍ انتشى له جسد إيهاب بانتصارٍ ثم جاور الطبيب يطالع الأخر من عليته ناطقًا بجمودٍ:
ملوش لازمة تخرجها يا دكتور، كدا كدا أختها هتدخلها دلوقتي.
نظر له الطبيب مُستنكرًا فاقترب منه يوسف يقول بنبرةٍ مُحذرة وقد فهم ما يفكر به الأخر من خلال نظرته:
عمهم! أهدا وأصبر على رزقك، هتضيع نفسك علشان زي دا؟ أركز يا إيهاب.
هتف إيهاب بثباتٍ دون أن يحيد ببصره عن فتحي:
أنا راكز أهو يابا شايفني بتنطط قصادك؟ بس أنا هجيب حقي البايت عنده، علشان من أبو أخر كدا حقي مبيباتش برة.
فور إنتهاء جملته أخرج سلاحه وشد أجزاءه ليصبح على أهبة الاستعداد في إطلاق النار حتى صد يوسف عليه مجال وجود الأخر وهو يقول مُهدئًا له:
اهدا، لو موته هتبقى بتريحه، اللي زي دا مينفعش يرتاح، لازم يتذل الأول، لو عاوز تاخد حق مراتك اللي هي أختي ومش هفرط في حقها مينفعش تعمل كدا، فكر فيها هي، ملهاش غيرك.
انتفخت أوداج إيهاب بغضبٍ وهتف بنبرةٍ أقرب للصراخ:.
وابن دا عارف إنها ملهاش غيره وفضل يفرك وكل مرة تكون معايا ييجي زي الحية من تحت التِبن، خلاص فاض بيا ومش هصبر كتير عليه، لو حافظ الشهادة قولها يالا.
صرخ بصوته فتأهب جسد يوسف وكذلك الطبيب الذي التزم الصمت تمامًا، فأي حديثٍ يُقال في مثل هذا الموقف؟ قبل أن يرفع إيهاب كفه نحو رأس فتحي أوقفه نَعيم ناطقًا بنبرةٍ جامدة يردع حركته هذه:
إيهاب!
التفت له بنظراتٍ جامدة خاوية وكأن الرؤية قد انعدمت عنه، ليضيف نَعيم من جديد بنفس الجمود:
لو فاكر إن حق مراتك هيضيع تبقى غلطان، مش أنا اللي اسيب حق اللي ليا، نزل سلاحك ومتضيعش نفسك علشان عِرة زي دا.
تنهد إيهاب بعمقٍ وقبل أن يخفض كفه باستسلامٍ رفعه من جديد يُطلق العيار الناري فوق رأس فَتحي ولم يفصل بينه وبين الطلقة سوى عدة انشات بسيطة جعلت فتحي يخر راكعًا من فرط لهفته على نجاته حيًا من هذا العيار، ليقترب منه إيهاب متشفيًا بنظراته وأكملها بقوله شامتًا:
المثل بيقولك العيار اللي ميصبش؛ يدوش وكفاية عليا أوي إنك تتذل كدا ولسه هذلك تاني وطول مافيا النفس وأنا حيِّ يبقى هتتذل أكتر وأكتر.
أشار للطبيب بجمودٍ هاتفًا بعدما رأى ذعر الأخر منه:
كمل اللي كنت بتعمله علشان عاوزه فيه النفس.
اعتدل بعدها خارجًا من المكان بنفس الشموخ وقد عقبه في سيره الشباب ومعهم نَعيم أيضًا الذي أطمئن على رجاله وقد وجد العديد منهم مُصابًا وكأن كل شيءٍ سبق وخُطِطَ له، لذا وقف يقول لأحد رجاله بنبرةٍ قوية يهدر بها:.
بكرة الصبح، تروح حي الإباجية تجمعلي كبارها كلهم وتجيب الحج سنوسي تاجر الخُردة، قبل الضهر يكونوا عندي هنا، فاهم يا دوشة؟
هتف بتأكيدٍ لأومراه واجبة التنفيذ:
طلباتك أوامر يا حج، عن إذنك هروح أشوف الرجالة.
تحرك الشاب فالتفت نَعيم إلى إيهاب الذي وقف يدخن سيجارته بشراهةٍ حتى اقترب منهم مُحي يقول بنبرةٍ هادئة بعدما أخذ المعلومات التي يريدها من البقية:.
العيال دول جايين تبع فتحي بيشتغلوا هجامين على الطُرق والبيوت، بس أساسًا شغالين على فرشة هدوم شباب على الطريق، واحد منهم هو اللي قال.
انتبهوا له، فتحرك نحوه إيهاب يضع يده على كتفه يضغط عليه وهو يقول:
عيشت يا أبو الرجولة، جِميلك دا على راسي من فوق.
هتف مُحي بزهوٍ في نفسه:.
تربيتك يا عمهم بعدين من يوم ماهي دخلت هنا وأنتَ قولت إنها تخصك وعنينا كلنا عميت عنها وبقت أختنا، هسيب أختي لواحد زي دا؟ المهم بس أول عيل ليك يبقى على اسمي.
تهجمت ملامح إيهاب وهتف مُستخفًا به:
لأ يا عم يفتح الله، هي ناقصة، بعدين على ما يكبر ويبقى من عينتك دي، مش هيلاقي حريم، هيلاقيك خلصت عليهم.
ابتسم له مُحي فعانقه إيهاب يعبر عن امتنانه له بدون أن يضيف أي كلماتٍ، ليبتسم مُحي ثم هتف بنبرةٍ هادئة وكأنه فهم سبب العناق قائلًا:
أنا معملتش غير الواجب يا إيهاب.
أبتسم نَعيم بخفةٍ ثم نطق بنبرةٍ جامدة:
يلا اطلعوا البيت ريحوا كلكم علشان الصبح تكونوا معايا، وأنتَ يا إيهاب على بيتك علشان مراتك متصحاش خايفة.
حرك رأسه موافقًا فهتف يوسف بثباتٍ:
طب همشي أنا بقى علشان أعرف أريح وأجي الصبح.
أوقفه نَعيم قائلًا بنبرةٍ جامدة:
استنى هنا! محدش فيكم هيخرج من البيت الليلة دي غير لما اتطمن أن المنطقة كلها بخير، إيه يضمنلي إن محدش مستني واحد فيكم برة؟ من هنا لبكرة الصبح محدش خارج من البيت، يلا اطلع ريح فوق.
هتف يوسف بلهفةٍ قاطعة يزيل قلقه:
يا حج احنا مش عيال، احنا بخير أهو، بعدين متنساش أنا مش لوحدي وفيه واحدة ملزومة مني ومش هأمن أسيبها.
ضرب نَعيم بعصاه أرضًا وهتف بنبرةٍ عالية تخرج جام غضبه المشتغل بداخله ولم يقو على إخراجه:
وأنا قولت مفيش خروج من هنا غير بكرة الصبح، خلاص مبقاش ليا كلمة تتسمع؟ كبرتوا عليا كلكم؟
تنحنح يوسف يُجلي حنجرته ثم هتف بخجلٍ:
لا عاش ولا كان يا حج اللي يقلل بيك، حاضر بس الأول اتصل بالحج عبدالقادر يحاول يطمني أو يخلي باله منها لحد ما أرجع.
حرك رأسه موافقًا ثم أشاح برأسه للجهةِ الأخرى وكأن زر التحكم في أعصابه قد فلت تحكمه ليجد نفسه على حافة الإنفجار بهذا الشكل لكنه آثر الثبات لحين حل تلك المشكلة.
أخرج يوسف رقم عبدالقادر الذي سبق وسجله على هاتفه، فجاوبه الأخر بدون أن يتعرف على هوية المتصل ليصله صوت يوسف يهتف بترددٍ:
أنا يوسف الراوي يا حج.
رد عليه عبدالقادر بلهفةٍ من اتصاله به في هذا التوقيت:
أهلًا يابني خير فيه حاجة؟ اؤمر.
تنحنح يُجلي حنجرته من جديد وقد زاد تردده عن سالفه يحاول إيجاد طريقة يطلب بها مساعدته، لكن صمته طال فهتف الأخر باسمه يجذب نظره من جديد، حينها قال يوسف يُلقي بحديثه دفعةً واحدة:
أنا للأسف مضطر أبات برة البيت، حصل ظرف ومش هينفع أرجع الليلة دي، بس فاتن في البيت لوحدها، ممكن بس حد يخلي باله منها، هي لوحدها أنا ممكن مأمنش عليها يحصلها حاجة، وتتعبني أنا.
ابتسم عبدالقادر وهو يرى خصال والده تظهر عليه حتى وإن كابر ورسم على نفسه ما يُخالف هذا، فهتف بنبرةٍ بها أثر انتصاره الغير مُبرر:
طب كويس جينات أبوك موجودة أهيه وخايف على عمتك.
هتف يوسف بنبرةٍ جامدة يُبدد ظنونه الغير مُحببة لديه ويجاهد لإصدار عكسها:
أنا مش خايف على حد ولا حاجة، أنا خايف بس لأنها مسئوليتي أنا في الأخر، إنما كدا كدا قلبي مش هامه حد.
هتف عبدالقادر بحنكةٍ تليق بشخصه:.
ياعم براحتك خلاص، كدا كدا اللي يهمك بخير.
أغلق في وجهه دون انتظار ردٍ منه مما جعل يوسف يعقد حاجبيه لكنه لم يهتم كثيرًا لذا وضع الهاتف في جيبه ثم تحرك لداخل البيت بخطواتٍ مُنهكة أظهرت تعبه.
دلف إيهاب شقته بلهفةٍ فوجدها لازالت غافية كما تركها وبجوارها تضع تحية رأسها على طرف الفراش، هتف بنبرةٍ هادئة مبحوحة من فرط انفعاله بالأسفل:
ست تَحية، ست تَحية!
انتبهت له المرأة فرفعت نفسها تفرك عينيها وقد فاجئها الضوء الساطع، فقال هو بنبرةٍ رخيمة يشكرها:
كتر خيرك يا ست الكل، انزلي ريحي يلا، ولا أدخلي الأوضة التانية ريحي فيها حبة بدل ما تنزلي دلوقتي.
هتفت هي بنبرةٍ ناعسة وقد وقفت من موضعها:
لأ يابني مش هعرف أنام هنا، أنا بس فضلت اطبطب عليها لحد ما نمت جنبها، هروح بقى علشان أقفل البيت هناك، ألف سلامة عليها يا ضنايا، ربنا يابني يبعد عنكم الشر.
حرك رأسه موافقًا ينظر في أثرها حتى خرجت من الشقة، فتحرك هو بجوار زوجته يقبل رأسها ثم خلع قميصه وتمدد بجوارها يضمها إليه هاتفًا بقلة حيلة:
حقك عليا أنا من الدنيا كلها، والله مش بأيدي إن كل دا يحصلك، أنتِ طيبة وغلبانة ودا نصيبك وأنا زيي زيك طيب وغلبان بس الحلو بقى إنك نصيبي.
وصله همهماتها وكأنها ترد عليه أو لربما تحلم به أو كأنما خالط صوته نومها الهاديء، فابتسم هو رغمًا عنه وهتف يمازحها قائلًا:.
طب وربنا حاسس إنك بتقولي متتأخرش عليا يا سي إيهاب.
ابتسم من جديد بيأسٍ ثم شدد ضمته لها بحمايةٍ لعلها تشعر ببعض الأمان المفقود منها بسبب ما عايشته في هذه الليلة العصيبة، فبالرغم من طريقتها واندفاعها الدائم وجرأتها في الكلام؛ إلا أنها ضعيفة كما جناح الطير المكسور.
في شقة تريز كانت تجلس آيات بجوار يولا وهي تسرد عليهن المقابلة بكافة تفاصيلها وهتفت بمرحٍ:
البنت رقيقة أوي وجميلة وتحسي بقبول غريب في ملامحها، ممكن تكون عادية ولبسها عادي مش ملتزم، بس بصراحة يعني هي جميلة وكلها ذوق.
هتفت تريز بنبرةٍ متفائلة وهي تتمنى إتمام الزيجة:.
أيوب غلبان يا حبة عيني وميستاهلش واحدة تتعبه، الله يرحمها رقية كانت بتخاف عليه من نسمة الهوا اكمنه يعيني طول عمره قلبه أبيض ومبيحبش يزعل حد، ربنا يفرحه بحق بكل الأيام اللي شافها صعبة، مشافش شوية برضه.
تنهدت آيات وهتفت بتأثرٍ تعبر عن خوفها:
عارفة يا طنط، ساعات كتير بخاف يطلع نصيبه زي أيهم، بتمنى أيوب يكون نصيبه أحسن، و أيهم ربنا يقدره ويعوض إبنه، أخواتي طيبين أوي والله.
هتفت يولا بحبٍ لها:.
صدقيني يابت محدش طيب غيرك، ربنا يكرمك ويعوضك أنتِ كمان، سمعت إن علاء الدين بتاع الحارة اتقدملك.
ابتسمت بخجلٍ فهتفت تريز باستنكارٍ لهذا الاسم:
مين علاء الدين؟ هي الحارة فيها حد اسمه كدا؟
هتفت يولا بضحكةٍ واسعة:
تَيام يا ماما ابن طنط نجلاء، ماهو شهرته كدا من صغره، والاسم لايق عليه والله.
ضحكت آيات فور تذكرها سبب التسمية، فسألت الأخرى تستفسر منهما أكثر عن سبب اللقب المُلقب به الأخر:.
وليه يعني؟ من قلة الاسماء؟
هتفت يولا بتفسيرٍ مرح:
أصله كان غاوي ينط من جنينة البيت ومعاه الحمام اللي كان بيربيه، الحارة كلها عارفة أنه كان بينط الجنينة من صغره حتى الحج نفسه، لما عرفوا إنه بيعاكس آيات طلعوا عليه الاسم دا، على أساس يعني أنها بنت الحج وهو العيل الشقي، بس دا كلام في سرك بقى.
هتفت تريز بنبرةٍ ضاحكة:
يا خيبتك التقيلة يابن نجلاء، اتاريك من يومك شقي والحارة كلها شاهدة عليك، طب صبرك عليا.
همت آيات بالوقوف قائلةً:
طب همشي أنا بقى علشان اتأخرت أوي و خايفة ملحقش أصلي وأنام، هاخد إياد ونمشي.
حركت الفتاة رأسها موافقةً فيما نطقت تريز بلهفةٍ:
ما تقعدي نسهر شوية، هو إحنا ورانا حاجة؟
ردت عليها باعتذارٍ:
والله اتأخرت أوي كمان عاوزة أروح علشان طنط وداد لوحدها من الصبح، هروح أشوفها أكيد ماخدتش علاجها.
تحركت معها تريز نحو الباب فيما دلفت يولا تجلب إياد من الداخل ليذهب مع عمته، وعند خروجه لها أمسكت كفه فصدح صوت تريز تقول بمرحٍ:
باركيلي للواد أيوب قوليله خالتك هتيجي تباركلك بس لما تاخد الموضوع رسمي، ولو ماخدنيش معاه هفضحه.
وقفت آيات بجوار المصعد تقول بلطفٍ:
منقدرش، عاوزة رقية تيجي في الأحلام تعاتبنا؟ مكانتش بتتحمل زعلك أبدًا.
لمعت العبرات في عينيها عند ذكر رفيقتها، بينما في الشقة المقابلة لهم كانت جنة تراقبهن من خلف الباب من خلال العين السحرية الموجودة بالباب، وعند استماعها للحوار الدائر شعرت بقبضة حادة في قلبها، كيف أن يذهب لغيرها بعدما حاولت بكل طاقتها لأجل الحصول عليه؟ لمعت العبرات الحزينة في عينيها وركضت نحو غرفتها تبكي بحرقةٍ وكأنه قد خذلها أو تلاعب بها، على الرغم من براءته في أي فعل يلتصق به أو تهمة توجه إليه.
ارتمت جَنة على الفراش تكتم شهقتها وهي ترى من أحبته يختار أخرى غيرها وكأنه يخبرها أنها أحق منها فيه.
جلست عهد بجوار شقيقتها الصغرى تقوم بعمل جديلتين لها في رأسها بدايةً من مقدمة رأسها حتى نهاية الأطراف كما تفضلها شقيقتها، هتفت بمرحٍ بعدما أنهت ما تفعله:
يلا يا وَعودة عملتهالك وصوابعي ورمت، الله يسامحك.
التفتت لها شقيقتها تقول بنبرةٍ ضاحكة:
عادي، فدايا فيها إيه يعني؟
ضحكت لها عهد ثم قبلت وجنتيها كلٍ منهما على حِدة وهتفت بتأكيدٍ وإصرارٍ:
الدنيا كلها فداكي، بس كدا؟
التفتت لها الصغيرة تقول بنبرةٍ حزينة:
عهد هي السماعة التانية هتتعمل إمتى؟
تنهدت شقيقتها بثقلٍ وهتفت بتأكيدٍ تحاول ادخال المرح على حديثها:
علي وصول ادعيلها أنتِ بس، مالك مستعجلة ليه؟
هتفت بحزنٍ حينما تذكرت تنمر الأطفال عليها وكذلك بعض الكبار الذي يمعنون النظر في وجهها:
علشان كل شوية حد يقولي أنتِ سامعة؟ أنتِ سامعة؟ إيه دا هي بتشتغل بالشحن؟ زهقت.
هتفتها الصغيرة بحنقٍ بسبب السماعة الطبية التي ترتديها، فتنهدت شقيقتها بعمقٍ ثم ضمتها إليها تقول بنبرةٍ هادئة تحاول تأكيدها على الوفاء بوعدها:
حقك عليا منهم، دول مش فاهمين حاجة، بس وعد مني هكلم الدكتورة أقولها تعمل السماعة التانية علشان محدش يزعلك تاني، تمام كدا؟
حركت رأسها موافقةً ثم استقرت بين ذراعي شقيقتها فأتت لهما والدتهما من الداخل تتحدث في الهاتف بتوترٍ قائلة:.
لأ يا حج ولا يهمك متقلقش، مفيش إزعاج ولا حاجة، ميجيش من بعد خيرك علينا، حاضر هتطمن عليها وأطمنك.
أغلقت الهاتف معه فسألتها عهد باهتمامٍ ظهر لها من حديثها في الهاتف:
حج مين يا ماما؟ فيه حاجة؟
ردت عليها مَي بحيرةٍ من تلك المكالمة:
والله يابنتي ما أنا عارفة، دا الحج عبدالقادر بيقولي قريبته ساكنة تحت بس هي لوحدها وبيقولي أقولها إن يوسف من جاي الليلة دي، مش عارفة بس هنزلها وخلاص.
حركت رأسها موافقةً بتفهمٍ ثم قالت تقترح على والدتها:
طب بقولك إيه، خدي ليها حتة عنب ولا حاجة من التلاجة أو أي حاجة حلوة يعني بدل ما تروحي بإيدك فاضية كدا
تنهدت مَي بعمقٍ وهتفت بقلة حيلة تجاري ابنتها:
حاضر يا أستاذة عهد طول عمر إيدك فرطة زي اللي خلفك ياختي.
أخرجت لسانها بقلة حيلة تستخف بالأمر لتتحرك والدتها من الشقة نحو شقة يوسف بعدما اخذت طبقًا صغيرًا به ثمرات فاكهة كما اقترحت ابنتها، وبعد مرور أقل من دقيقة زمنية وقفت أمام بابها تضرب الجرس بيدها حتى اقتربت فاتن من الداخل تسأل بصوتٍ مهتزٍ خوفها بسبب خوفها من الجلوس بمفردها:
مين؟
هتفت مَي تعرف نفسها بقولها:
أنا يا مدام، جارتك ومن طرف الحج عبدالقادر.
تنهدت فاتن وما إن سمعت اسمه يُذكر فتحت الباب وكأنها تؤكد لنفسها أنه لن يتسبب في إيذائها، فابتسمت لها المرأة وهي تقول بنبرةٍ هادئة:
أنا آسفة أني جيتلك متأخر كدا من غير ميعاد، بس أنا جاية اطمنك وأقولك إن يوسف بخير بس مش هينفع يجي هنا الليلة دي، و الحج بيقولك لو تليفونك مقفول افتحيه أحسن علشان يوسف يعرف يكلمك.
حركت رأسها موافقةً فقدمت لها الطبق وهي تقول بخجلٍ طفيفٍ مما وضع به:.
دي بقى حاجة بسيطة تتسلي فيها، ولو مخنوقة لوحدك أنا وبناتي مش معانا حد، تعالي اقعدي معانا، كدا كدا إحنا بنسهر كلنا.
هتفت بترددٍ وهي تطالعها بحيرةٍ فهي حقًا ملت من الجلوس بمفردها ومن السكون المُخيم على المكان، لذا هتفت بخجلٍ:
بصراحة أنا خايفة من الهدوء دا، الشقة فاضية أوي ومفيهاش صوت خالص، مهما كان برضه يوسف هنا بياخد بحسي.
تحدثت مَي بلهفةٍ تعاتبها بقولها:.
ليه بس كدا؟ تعالي اقعدي معانا إن شاء الله حتى تباتي، بدل ما القعدة لوحدك كدا، تعالي بس بالله عليكي.
حركت رأسها موافقةً ثم أخذت المفتاح من الحامل الموضوع بجوار باب الشقة ثم خطفت حجابها الأسود تلقيه عليها وهاتفها أيضًا وكأنها وجدت نجدتها وليس مجرد جارة لها، بينما الأخرى ابتسمت لها ثم أخذتها نحو شقتها تجلس معها بصحبة فتياتها.
دلفت فاتن معها وفتحت هاتفها حتى تتحدث مع يوسف وفور وصوله رسالة فتح هاتفها تلهف لمكالمتها وقد طلب رقمها وهو يقول بلهفةٍ ظهرت بقدر ما حاول إخفائها:
أنتِ كويسة؟
ردت عليه بتاثرٍ وكأن لهفته هذه هي أكبر ما تتوق إليه نفسها المحرومة من كل شيءٍ:
كويسة علشان اطمنت عليك، أنتَ كويس؟
تنهد بثقلٍ وهتف بنبرةٍ رخيمة بها أثر نعاسه:
آه. كلتي حاجة؟
اتسعت بسمتها أكثر وهتفت بنبرةٍ مختنقة:
آه الحمد لله.
لاحظ هو اختناق صوتها وتأكد أنها على حافة البكاء، فمسح وجهه وسألها بنبرةٍ جامدة تُنافي حديثه:
طب كلتي إيه؟
ضحكت رغمًا عنها وهتفت بصوتٍ مُحشرجٍ:
الأكل اللي اتبقى من الغدا، متقلقش، وشكرًا إنك خليت حد ييجي يتطمن عليا، أنا عند أم عهد جارتنا.
انتبه هو لذِكر اسمها فانتبه وقد تذكرها وهتف بنبرةٍ هادئة:
آه. طب كويس علشان متفضليش لوحدك، بكرة هاجي بعد الضهر، عاوزة حاجة؟
نفت عرضه وأخبرته أن يحافظ على سلامته ليغلق معها الهاتف ثم وضعه بالشاحن وأرخى جسده على الفراش يُغمض جفونه وكأن مهمة الإطمئنان عليها هي أثقل ما وقع على عاتقه.
في صبيحة اليوم الموالي لهذا.
كانت آيات في البيت من الداخل ترتدي ملابس بيتية مُريحة ناسبت تقاسيم جسدها، فصدح صوت جرس الباب حاولت الركض حتى ترتدي إسدال البيت أو ما شابه، لكنها تفاجئت ب جنة تنادي عليها بصوتٍ عالٍ حتى زفرت بقوةٍ ثم خرجت لها تقول بترحيبٍ:
اتفضلي يا جنة أهلًا وسهلًا، البيت نور بيكِ.
ابتسمت لها الأخرى بتوترٍ وقالت بنبرةٍ هادئة:
منور بأهله وصحابه، كنت جاية اتكلم معاكي وراكي حاجة؟
حركت رأسها نفيًا و أشارت لها بالجلوس في الغرفة المُخصصة لذلك، حينها جلست الأخرى تفرك كفيها ببعضهما وقالت بتوترٍ بعدما حاولت رسم خريطة التحدث في عقلها المتهور:
هو صحيح أستاذ أيوب خطب؟
فهمت آيات سبب تواجدها هنا بعد حديثها ونظرًا لعلمها بمشاعرها وبما تكنه لشقيقها هتفت بنبرةٍ هادئة تحاول بها إثناءها عما تفكر به تجاه شقيقها:.
بصي يا جنة أنا فاهمة كويس أنتِ ممكن تكوني حاسة بإيه ناحيته ومش بلومك، إحنا مش ملايكة يعني كلنا، بس غلط إنك تعشمي نفسك بحاجة زي دي، أيوب أخويا للأسف مش ليكِ، مش قصدي لحاجة وحشة فيكِ، أعوذ بالله، بس الحِسبة نفسها غلط، وأنتِ مشاعرك مفهومة غلط.
داهم البكاء عينيها الخضراوتين وسألتها بنبرةٍ باكية:
إزاي؟
تنهدت آيات وهتفت تفسر لها بلطفٍ حتى لا تتسبب باحراجها:.
يعني أنتِ حبتيه لوصفه مش لشخصه، إنسان سمعته حلوة وشاب ملتزم وسيم ومهتم بنفسه، إمام مسجد، كلها صفات مُكتسبة، إنما لشخصه هو متعرفيهوش، متعرفيش صفاته هو إيه، كلها صفات خارجية.
سألتها باندفاعٍ:
والبنت اللي هو خطبها بقى تعرف شخصه؟ أخوكِ مش مدي فرصة لحد يعرف عنه أي حاجة أصلًا.
تعجبت آيات من حديثها لكنها نحت تعجبها جانبًا وابتسمت بلطفٍ تقول لها:.
هو للأسف برضه مش مديها أي فرصة، بس الفكرة إن دا نصيب، يعني ربنا أراد أن نظره يتشد ليها هي، علشان يمكن يكون فيه بينهم اي حاجة، ولو هي نصيبه يبقى خلاص، قُضي الأمر.
مسحت جنة دموعها وهتفت بنبرةٍ مختنقة وهي تُشفق على حالها وتتذكر ما فعلته حتى تلفت نظره:.
بس أنا لبست الخمار علشان عارفة أنه لما ييجي يختار هيختار بنت ملتزمة، وبقيت بحاول كتير أعرف حاجات في الدين رغم أني بواجه صعوبة في دا، بس لسه بحاول علشان أليق بيه.
صرحت بكل حقيقة عما قامت بفعله، حينها تنهدت آيات ولأخر لحظة في التحدث معها آثرت النبرة اللطيفة قائلةً:.
وعلشان كدا هتحسي إنك مش مرتاحة، المفروض إن كل اللي بتعمليه دا يريحك، بس للأسف مش هترتاحي لأن النية فاسدة، إنما الأعمال بالنيات، وللأسف نيتك كانت مش صحيحة، يعني المفروض إنك تلبسي الخمار علشان دا فرض ربنا أمرك بيه، مش علشان عريس ملتزم، والمفروض بتذاكري دينك وتدرسيه علشانك أنتِ كمسلمة مش علشان تليقي ب أيوب المفروض التزم بالصلاة علشان دا واجب عليكِ مش علشان أيوب يعرف إنك بتصلي، هي مش كدا يا جنة، للأسف دي كلها نوايا فاسدة أفسدت عملك الصالح، اوعديني إنك تغيري نواياكِ دي وتقربي من ربنا علشان عاوزة دا من كل قلبك، وأنا معاكِ هساعدك، بس اوعديني إنك متزعليش نفسك.
هتفت جنة بصوتٍ مختنقٍ من فرط البكاء:
مش هقدر والله، أنا عشمت نفسي بالجامد، فضلت اتمنى اليوم اللي هنكون فيه سوا، صدقيني صعب أوي.
تنهدت آيات واقتربت منها تربت على ظهرها تقول بشفقةٍ مليونوتأثر من دموعها:
متعيطيش طيب، ربنا يسعدك ويكرمك بواحد أحسن منه مرة، متزعليش نفسك.
انتحبت جنة بحزنٍ ويأسٍ على حالها، فتنهدت آيات بضيقٍ وكأن كل محاولاتها في التهوين عن الأخرى ذهبت سدى وكأنها لم تملك شيئًا تفعله بعد.
في منطقة نزلة السمان
جلس نعيم وسط التُجار كبار منطقتهم وقد ذاع صيتهم في كل مكانٍ وقد جاوره الشباب من على طرفيه، وفي كل طرفٍ يجلس إثنان، كان هو يراقبهم بنظراتٍ ثاقبة حتى قال أحدهم بنبرةٍ هادئة يُكن له التقدير:
حقك علينا يا حج نَعيم ولأجل الود بيننا طلباتك يا كبير وحكمك نافذ على كبيرنا قبل صغيرنا، طالما الغلط من عندنا.
هتف أخرٌ بنبرةٍ جامدة وكأنه يتأهب لافتعال المصائب بينهم:.
لامؤاخذة يا حج يعني احنا جايين لاقيين رجالتنا مضروبين ومعدومين العافية، يعني عدم المؤاخذة أمور بلطجة في بعضها، يعني الحق اتاخد خلاص.
تأهب جسد الشباب وقبل أن يندفع أيًا منهم، رفع نَعيم كفه لهم ليرتخي جسدهم من جديد وهم يعلمون أن سيرد كرامتهم لهم من جديد وهذا ما حدث حينما هتف:.
لو زي ما بتقول إن الحق رجع يبقى زمانك جيت هنا لاقيني معلق رقابهم على بوابة بيتي، بس أنا بس كنت بوقفهم عند حدهم، لو زي ما بتقول إن بيتي دا فيه بلطجية، أحب أعرفك على البلطجية اللي أنا مربيهم.
توقف للحظةٍ عابرة يوزع نظراته عليهم ثم بدأ باشارته على الشباب بدءًا من إيهاب قائلًا بفخرٍ:.
البلطجي الأول دا زي ما بتقول اسمه إيهاب الموجي خريج كلية التربية الرياضية، يعني كابتن قد الدنيا ومدرب خيول مجاش منه اتنين.
توجهت الأبصار نحو إيهاب فيما هتف نَعيم من جديد مشيرًا على إسماعيل الذي جاور شقيقه وهو يقول بنفس الفخر:
أما بقى دا أخوه الصغير، إسماعيل الموجي خريج كلية آثار جامعة القاهرة، جايب امتياز طول سنين دراسته، دا البلطجي التاني.
انتقلت الأبصار ليبتسم إسماعيل بزهوٍ فانتقل نَعيم بإشارته نحو يوسف هاتفًا بنفس الفخر:
أما دا بقى فاسمه يوسف الراوي مهندس بترول خريج كلية البترول جامعة السويس، مهندس بترول عامل بحث يقعد اجدعها وزير في البيت، دا البلطجي التالت
نظر له يوسف بامتنانٍ ونظراتٍ تنطق بالحب، ليشير هو نحو الأخير وماهو إلا مُحي وهتف بفخرٍ قلما يراه إبنه منه وقد انتهى حديثه بالانفعال هادرًا:.
اما دا بقى البلطجي الرابع والأخير اللي لحق أخته امبارح والسكينة محطوطة على رقبتها، دا طالب بكلية الصيدلة، دكتور يعني، ها يا معلم سيد؟ لسه شايفهم بلطجية؟ فوق لنفسك وأعرف أنتَ بتكلم مين وعن مين، مش نَعيم الحُصري اللي يربي بلطجية، أنا مربي رجالة زي الخيول العربية، متنحنيش لو بموتها، لو بنتكلم عن البلطجية بجد، يبقوا اللي دخلوا البيوت في نصاص الليالي يتهجموا على حُرمة البيوت، خلاصة القول أنا مش هحكم، الحكم للراجل اللي مراته شافت الموت امبارح بعنيها.
وقف إيهاب بشموخٍ يرفع رأسه وفور رؤية نظرات التشفي من الأخرين وكأنهم ينتظرون منه التقليل بالأخر، حينها التفت ل نَعيم يخبره بإذعانٍ له يزيد من قيمته أمامهم:
لا عاش ولا كان اللي يتكلم في وجودك يا كبيرنا، إحنا ولاد أصول واتربينا على إيدك منعديش الأصول دي، علشان كدا الكلمة كلمتك، وأنا واثق إن حق مراتي هيرجع بطريقتك واللي تشوفه، اؤمر يا عمنا.
أبتسم نَعيم بفخرٍ وحرك رأسه نحو الرجال يهتف بزهوٍ:.
أهيه دي تربية الرجال ولاد الأصول، وعلشان هو كبرني زي ما أنا كبرتكم، حكمت بحق منكم لينا، رجالتكم يحقوا نفسهم لرجالتي قدام الكل، وخصوصًا للراجل اللي مراته اتضرت قصاد عينيه، ويتدبح عِجل فدا لروحهم اللي واجب عليا أخدها بعدما اتهجموا على حُرمة بيتنا، دي نهاية القول، قولكم إيه؟
نظروا لبعضهم البعض يفكرون في حديثه وطلباته وفي نهاية الأمر تم الإتفاق بينهما بالنظرات لينطق كبيرهم بنبرةٍ هادئة خاضعة:.
حقك يا كبير، اليوم اللي تحدده احنا كلنا هنكون تحت أمرك.
ابتسم نَعيم بزهوٍ وهتف بثباتٍ:
علي بركة الله، استنوا مني ميعاد، وطبعًا مش هنبه إن لو حد فكر بس يعيد اللي حصل أنا هقطع رقبته، وكدا يبقى كتر خيري أوي أني مستحمل.
حركوا رأسهم بموافقةٍ له، وبعدها رُفعت الجلسة ومنها توجه كلٍ منهم إلى مكانه وأولهم يوسف الذي أعتذر ورحل من المنطقة لكي يذهب إلى حارة العطار بعدما ترك شئونه بها بل وكامل حياته كما زعم أخيرًا، لذا قبض على ميدالية مفاتيحه التي تحوي شكل القمر وتنهد بعمقٍ وهو يقول بنبرةٍ خافتة يحاول طمئنة نفسه:
هانت. هانت يا حبيبة عيون يوسف.
جلس أيوب في محله يتابع كافة شئونه وهو يرى انتقال المواد الفخارية من مكانه نحو عربة النقل، حيث وقف يضع كفيه في جيبي بنطاله يبتسم ببشاشةٍ في أوجه العابرين، حتى عبر يوسف من أمامه بعدما أوقف سيارته أسفل البناية، فناداه أيوب بنبرةٍ عالية جعلته ينتبه له فاقترب منه يعقد حاجبيه، فيما هتف أيوب بنبرةٍ هادئة يحاول الأطمئنان عليه:
الحج قالي إنك ماكنتش في الحارة إمبارح، عربيتك فين؟ أنتَ كويس؟
لم يدر يوسف لماذا رأى اهتمامه هذا صادقًا لذا حرك رأسه موافقًا وهتف موجزًا بنبرةٍ هادئة:
متقلقش أنا كويس أوي الحمد لله، أنا بس ركنت العربية وقولت أجيب حاجة جاهزة للغدا، شكرًا يا سيدي على اهتمامك بيا.
ابتسم له أيوب ورفع كفه يضعه على كتفه هاتفًا بنبرةٍ هادئة يرفع عنه حرجه:.
الشكر لله سبحانه وتعالى، ثانيًا متشكرنيش، دا حقك عليا، وياريت لو تشرفني في المحل هنا تشرب معايا كوبايتين لمون بالنعناع، عمايل ايد أخوك.
هتف يوسف بضحكاتٍ يائسة رغمًا عنه:
ليه محسسني أني داخل حارة الشيف الشربيني؟ ياسيدي ألف هنا على قلبك.
ابتسم له أيوب وأشار له بالدخول، فدلف يوسف رغمًا عنه بعدما تنفس بعمقٍ يجاور أيوب لكن عيناه فورًا جالت بالمكان المُضيء وبالأدوات الفخارية المصنوعة، فوجد نفسه يبتسم وهو يسأله متعجبًا:
كل دا أنتَ اللي عامله بإيدك؟
حرك أيوب رأسه موافقًا وهتف مؤكدًا:
آه. موهبة ربنا كرمني بيها، بعمل من الفخار كل حاجة.
ابتسم يوسف بإعجابٍ وأمسك بإطارٍ فخاري يقلبه بين كفيه وفورًا تذكر أمر الصورة التي قام هو بصنعها فهتف بلهفةٍ:.
تعرف تعملي واحد زي دا كبير؟ يشيل صورة غالبًا 100 × 70، على صورة محتاج ليها إطار زي دا.
حرك رأسه موافقًا وأضاف بوجهٍ مبتسمٍ:
طبعًا، بإذن الله أقدر، قولي بس عاوزه إمتى؟
حرك كتفيه وهو يقول بنبرةٍ هادئة:
أي وقت براحتك طبعًا، الصورة جاهزة من زمان.
ابتسم له أيوب ثم أشار له بالجلوس ليجلس يوسف فيما تحرك أيوب نحو البراد الصغير الموضوع بمحله وأخرج منه العصير يضعه أمام يوسف كما فعل مع شقيقته ليبتسم بهدوءٍ وهو يقوم بسكب العصير بالأكواب ثم اقترب يضعها على الطاولة وهو يقول:
بألف هنا يا غالي.
تنهد يوسف بعمقٍ ثم أمسك كوبه وهو يقول:
الله يهنيك يا عمنا.
جلس أيوب يحاول البدء في التحدث في موضوع عائلته، لكن صدح صوت هاتفه عاليًا برقم بيشوي فزفر بقوةٍ ثم أجاب على الهاتف ليصله صوت الأخر يقول بقلقٍ:
بقولك إيه، العصفور داخل عليك، واخد بالك؟
هتف أيوب باستنكارٍ:
إيه؟ جاي ليه دلوقتي؟ بقولك إيه هو عندك.؟
قبل أن يجاوبه بيشوي انقطع الإتصال بينهما ليزفر أيوب مُطولًا فسأله يوسف بتعجبٍ:
خير؟ فيه حاجة؟
نظر له أيوب وقبل أن يجاوبه وصله صوت أخر من توقع تواجده أمامه قبل ذلك يهتف بسماجةٍ كشخصه:
السلام عليكم يا شيخ أيوب، أنا جاي اعتب عليك، مش عيب تزحلقني علشان عينك من الحِتة؟ طب قولي إنك كنت رايد قمر أنتَ كمان بدل الفيلم الهندي دا.
تأهبت حواس يوسف وسقط الكوب من يده فور ذكر شقيقته أمامه وحرك رأسه نحو أيوب يطالعه بعينين مُتسعتين هاتفًا بحدةٍ بالغة وقد نفرت عروقه بشكلٍ ملحوظ:
قمر!
أبتسم علاء باستهتارٍ دون أن يعلم هوية الجالس أو حتى عاقبة ما تفوه به أمامه:
الله؟ أنتَ كمان تعرفها؟ هي مدوراها ولا إيه و عطلانة عند العبدلله لوحده ولا إيه؟
انتفض أيوب من محله يهدر بنبرةٍ عالية:
ولا! الزم حدود بدل ما أطلع روحك في أيدي، سيرتها متجيش على لسانك تاني، أنَتَ فاهم؟
ابتسم له علاء باستخفافٍ يثير برودة أعصابه حتى اقترب منه أيوب يحاول لكمه ليجد يوسف يردع حركته هذه بنظراتٍ قوية وهتف من بين أسنانه يسأله:
هي قمر اللي تخصني؟
لم يجد أيوب بُدًا من الكذب فحرك رأسه موافقًا وعيناه تلمع بإصرارٍ لم يقو يوسف على تكذيبه، ليصلهما صوت علاء مستنكرًا بقوله:
تخصك أنتَ كمان! الله واضح إن الشيخ مزعل ناس كتير.
انتبه له كلاهما، فهتف يوسف بشرٍ وصدره يعلو ويهبط من فرط التأهب الذي استعد به جسده وتشددت به أعصابه عند سماعه ماسبق:
وأنا ميهونش عليا زعلك يا ريس.
قال جملته ثم رفع كفيه يهبط بهما على وجه علاء فابتسم أيوب ساخرًا وهتف بنزقٍ يخالف فرحته في الأخر:
ليه بس كدا يا يوسف؟